Nongpoh, Nailur 18: Katto katne sngi hadien ba ka kynhun ki nongniah kali ha Meghalaya kiba don ha ka shatri jong ka All Khasi Meghalaya Tourist Taxi Association (AKMTTA), ki la bat bad pynwit ia ki kali Assam, kiba kit ia ki nongjngohkai pyrthei bad kiba thmu ban leit sha ki jaka bapher bapher ha Ri Lum Khasi, mynta ka sngi pat, sa ki nongniah kali kamai na Meghalaya, ki la mad jingeh haba ki thmu ban leit buh ia ki nongleit nongwan sha Assam bad kata ka dei hadien ba ki la shah bat bad shah pynphai noh ha ki nongniah kali na ka jylla Assam.
Ka jingshah pyndik ki kali kamai ba kit ia ki nongleit nongwan mynta ka sngi ha Jorabat, ka la ktah ia ka jingsngew jong ki nongniah kali na Meghalaya bad khamtam eh ia kito ki nongleit nongwan kiba donkam kyrkieh, ba leit sha Airport, Steshon Rel, sha ki jaka sumar lem bad sha kiwei pat ki jaka.
Ka jingtip kaba la iohlum, la ong ba ha katei ka jingmih paidbah ki nongniah kali na Assam, ki la pynphai ia baroh ki kali Meghalaya, kata naduh ki kali kamai bad ki kali jong ki riew shimet ruh kumjuh.
Lah buh ban kdew hangne, ba dang hynnin ka sngi, la don ki kali na Meghalaya bad kiba mut ban leit kit nongleit nongwan na Airport Guwahati, ki la shah beh noh ha ki nongniah kali kamai na Assam, ha kaba kitei ki nongniah kali na Assam, ki la ong ba kumno phi wan kit Passenger nangne, katba ia ki kali Assam kiba leit sha Meghalaya phi la pynwit.
