Hadien bala pyndep ïaki jingdonkam baroh, ïaka met u Zubeen Garg u nongrwai ba paw ka jylla Assam u ba ki paidbah ki ieid bad sngewtynnad la wanrah noh sha India lyngba ka liengsuiñ.
Naka liang u Myntri Rangbah ka jylla Assam u Himanta Biswa Sharma u la pyntip lyngba ka rynsan X ba ka synduk kaba kit ïa ka met jong u Zubeen Garg baieit jong ngi na Singapore ka long kaba heh palat ban buh ha kano kano ka liengsuin ai wai, wat hapdeng ka jingpyrshang kaba jur jong ngi la palat ar kynta. Ia ka met iap jong u mynta la pynkit sha Guwahati da ka liengsuin Air India Express flight IX 1197, kaba la mih ha ka por 4:30 mynstep.
Kum ban shu pynpaw ba u nongrwai ba pawnam ka jylla Assam u Zubeen Garg u la khlad noh haka janmiet jong ka sngi thohdieng katba u dang pynlut por ïalade ban jngi um ha Singapore hadien ba u la mynsaw, ha ka por ba u leit jngi um, haduh ba um lah shuh ban ring mynsiem bad la pynkit mar mar sha ka jaka sumar ha Singapore General Hospital hynrei u la khlad noh ha ICU, katba u dang shah sumar. U Zubeen Garg u la don 52 snem ka rta bad ieh noh shadien ïaka tnga bad baroh ki baieid bathoiñ hadien ba u la leit sha Singapore ban iashim bynta ha ka North East Festival kaba lai sngi kaba la thmu ban sdang ha ka sngi thohdieng, hynrei ka long pynban ka khubor kaba kthang hadien ba ki doctor kila pynbna ba u la khlad noh ha ICU haka por kumba 2:30 eiei janmiet.
Ka met jong u Zubeen Garg kala poi mynta ka step ha nongbah Guwahati bad naka liang ki bor sorkar jong ka Assam kila pyntip ruh ba ïaka met u Zubeen Garg yn rah sha Arjun Bhogeswar Baruah Sports Complex (Sarusajai Stadium) naduh ka 9 baje mynstep haduh 7 baje janmiet mynta ka sngi u Blei na ka bynta ki paralok, ki nongbud, bad ki nongkyrshan ban ai ka jingburom kaba khatduh.
U Myntri Rangbah ka jylla Assam u Himanta Biswa Sharma u la pyntip ruh ba mynta ka sngi ha ka por 6 baje janmiet kan don ka jingialang jong ka kynhun myntri ban rai ia ka jaka thang ia u Zubeen Garg.
