Kumba ju long man la u snem, ban ai mynsiem bad pynshlur ïa ki samla ka thaiñ Western Ri-Bhoi ban trei shitom bad kiew shaphrang ha ka jingpule, ka NPP Jirang Block ryngkat bad u MLA ka thaiñ uba dei ruh u Myntri ka Sorkar Jylla, Bah Sosthenes Sohtun, ki la pynkup burom ïa palat spah ngut ki khun samla na ka thaiñ Jirang kiba la pass bad wan sha khmat ha ka eksamin SSLC 2025 haka jingïalang kaba la long ha St. Peter Higher Secondary School, Umkadhor.
Ha kane ka sngi, nalor ka jingai burom ïa ki samla kiba pass bha, la sam ruh ki khusnam kyrpang sha ka samla Safilia Wahlang, kaba wan ha ka kyrdan ba lai ha ka Top 10 jong ka SSLC Arts Stream. La ai burom ruh ïa ka samla Ribansi Jamu kaba la mihkhmat ïa ka ri India ha ka kynhun lehkai phutbol, bad ïa u Bah Esman Lyngdoh, Sordar Shnong Umkynsier uba la shakri ïa ka shnong la kumba 25 snem.
La sakhi lang ïa kane ka jingïalang da u Bah Sosthenes Sohtun, MLA ka Jirang u ba long ruh u Myntri ka sorkar, ka Kong A. Mawa, Principal Patharkhmah Model Degree College, u S.K. Tiwari, Principal Jirang Government Higher Secondary School, Bah Balawan Syiemïong, Secretary NPP Jirang Block, ki nongïalam shnong, ki kmie ki kpa lem bad ki samla pule ka thaiñ.
Haba ai jingkren, u Bah Sosthenes Sohtun u la pynpaw ka jingsngewkmen kaba khraw ban iohi ba man la u snem ki samla ka thaiñ ki sdang ban kiew shaphrang ha ka jingpule bad wan ha ki kyrdan kiba shalor, kaba long ruh ka jingsarong na ka bynta ka thaiñ Jirang baroh kawei. Kum u MLA bad myntri sorkar uba dang shu shah jied, u la kyntu ïa ki khun samla ba kin bteng ban trei shitom, bad ïa ki samla kiba dang pule ruh ban pule thop bad pynleit jingmut ha ka por pule khnang ba kin jop bad poi sha ka thong jong ki.
