Nongpoh, Nailur 29: Ka Dorbar Shnong Lum-Nongthymmai ha Byrnihat, ka la pynkup burom ia u Bah Sosthenes Sohtun, uba dei u Rangbah Shnong barim katei ka shnong, nangta u kiew sha kyrdan MLA, MDC bad uba la long mynta kum u Myntri ha ka Sorkar jylla, ia kaba ki la pynkup burom ha Iing Dorbar jong katei hi ka shnong.

Ha kane ka sngi, ba ka shnong Lum-Nongthymmai ka la pynlong ia katei ka jingpynkup burom, naduh ki Seng longkmie, ki Seng Samla bad ka Dorbar Shnong, ki la ai da ki jingai sngewbha sha u MLA, kaba pynpaw kum ka dak jong ka jingsngew sarong ba na katei ka shnong, la mih u Mawlynnai, uba long kum u MLA, MDC bad kum u Myntri Sorkar, u ban sa peit ia ki paidbah ha ka jylla hi baroh kawei.

Ki nongkren ha katei ka sngi, kata kiba kynthup naduh u Rangbah Shnong, ki nongialam Seng Longkmie bad Seng Samla, ki la pynpaw ia kata ka mynsiem kaba sngewkmen eh ba u briew na ka shnong, uba dei ruh u Rangbah Shnong barim ka shnong, ba un long kum u MLA la arsien, hadien kata kum u MDC bad mynta lei kum u Myntri Sorkar ba dei peit ia ka tnat Community and Rural Development.

Ki la ong ruh, ba u Bah Sosthenes Sohtun, wat ha shnong ruh u long u briew uba sngewrit bad uba ïoh jingieid na baroh, kata naduh ki heprit bad haduh ki tymmen ki kro.

Ha katei ka sngi, ba la pynkup burom ia u Bah Sosthenes Sohtun, la sakhi da ka jingdon u Bah Iaineh Wahlang, Rangbah Shnong Lum-Nongthymmai, u Bah Vigian Kharkongor, President Seng Samla, ka Kong Eucivia Suting, President Seng Longkmie, ki riew rangbah lem bad baroh ki riew paidbah ha katei ka shnong.

Haba kren ha katei ka sngi shah pynkup burom, u Bah Sosthenes Sohtun, u la sngewnguh eh ia Dorbar Shnong, kaba la kynmaw bad ban pynkup burom ia u, namar u sngew ba ka jingshah pynkup burom ha ka shnong, ka dei ka burom kaba khraw eh bad kaba pynpaw ba kaei kaei kaba ioh jingshaniah na ka shnong ka thaw, ka dei kaba donkam eh.