Shillong, Nailur 29: U chief secretary (CS) ka Jylla u Bah DP Wahlang u ban shongthait noh haka 30 tarik Nailur 2025, ula pynpaw ka jinghun mynsiem ban pyndep iala ki kam ba u la leh kum u CS ka Jylla Meghalaya.
Haba kren shaki lad pathai khubor hashuwa ban shongthait noh u Chief Secretary ula ong ba u dap daka jingkmen namar ula pyndep iaki kam kum u CS haki lai snem ba u bat.
U Bah DP Wahlang ula ai ka jingiaroh iaka kynhun kaba u ialam naduh ki ophisar ha Secretariat haduh ki District ka Jylla kiba la trei bha naka bynta ka bha ka miat jong ki paidbah bad ka Jylla baroh kawei.
Ula ong ba kum u Chief Secretary ula ioh lut ka jingkyrshan kaba pura na baroh ban pyndep iala ka kamram.
“Hoid ki don ki khep ba wan ki jingiatyngkhuh haka por ba nga bat kum u Chief Secretary khamtam haba iadei bad ka jingjia shah siat iap ki briew ha Mukroh West Jaintia Hills, ki jingiakajia haki thain khappud Meghalaya-Assam, ka jinglong jingman ki thain khappud namar ka jingiakhih ha Bangladesh hynrei lada khien kyllum lang, nga long ba donbok namar kam shym la don kano kano ka jingkulmar bad ka jinglong jingman hapoh ka Jylla ka long kaba jaijai” la ong u Bah DP Wahlang.
U Bah DP Wahlang ula ong “Donkam ban trei bha shuh shuh bad donkam ban shim rai ym tang daka jingpyrkhat hynrei donkam ruh ban shim rai naduh ka dohnud bad daka jingsngewrit”.
Haba kyntait ban iaroh da lade iaki kam ba u la leh, u Bah DP Wahlang ula ong “Kam iahap ba ngan put turoi da lade hynrei phi lah ban kylli na kiwei ki ophisar ban tip iaki kam bad ki sienjam ba nga shim kum u Chief Secretary naka bynta ka bha ka miat ki paidbah bad ka Jylla baroh kawei”.
U la ong ba kum u Chief Secretary ula shimkhia bha ban wanrah ka jingkylla hapoh ka Administrative System hapoh ki Directorate bad ka jingwanrah jingkylla iaka Service Rules jan ha baroh ki tnat treikam ka Sorkar Jylla.
“Ngi la pynlong ba donkam eh (Mandatory) ba baroh ki tnat treikam ka Sorkar Jylla kidei ban don iaka Services Rule bad lada kim don iaka Services Rules ka Departmental Promotion Committee ruh kan nym shong jingialang” ula ong.