Shillong, Nailur 29: U Chief Secretary ka Jylla u Bah DP Wahlang ula ong ba ka long kaba donkam ban iatreilang naka bynta ban pynduhjait ia u Drok naka imlang sahlang hapoh ka Jylla Meghalaya.
Haba kren shaki lad pathai khubor u Bah DP Wahlang ula ong baka Sorkar kala shim iaki sienjam bapher bapher ban iakhun pyrshah Drok, daka ba pynkha iaka Anti Narcotic Task Force (ANTF), ka DREAM Project, daka ba pynbun ki jaka sumar (Rehabilitation Centre) bad kiwei kiwei ki sienjam.
“Hynrei kaba donkam eh kadei ban iatreilang lang bad baroh ki kynhun naduh ki Dorbar Shnong bad ki paidbah namar ban shu kem iaki ba dih bad iaki ba die Drok kan nym iarap iaka Sorkar ban pynduh jait ia u Drok napoh ka Jylla” la ong u Bah DP Wahlang.
U Bah DP Wahlang ula ong ba ka long donkam eh ban pynbun ka jingpynsngewthuh (Counselling) hala ki shnong ki thaw, daki briew ba tbit, daki Dorbar Shnong bad da ki kynhun niam iaki lanot kiba la ngop ha u Drok.
