Nongpoh, Risaw 01: Ka skul Little Flower Higher Secondary School kaba don ha ka shnong Mawbri, mynta ka sngi, ka la ïoh ban pynkut noh ia ka jingrakhe Golden Jubilee ne ka rakhe dap sanphew snem, ha ka jingshakri ban long kum kata ka shlem ai jinghikai ia ki khynnah ha katei ka thain hi baroh kawei.

Ha katei ka sngi ba ka skul Little Flower Higher Secondary School, ka la pynkut noh ia katei ka jingrakhe dap sanphew snem, la sakhi da ka jingdon u Conrad K. Sangma, Myntri Sorkar kum u Kongsan, ha ryngkat ka jingdon u Damanbait Lamare, MLA Umroi, kum u Symbud Kongsan, u Bah Isynei Hinge MDC Umroi, u Fr. Balestine Marbanniang, Principal ka skul, ki ophisar sorkar, ki nonghikai lem bad ki khynnah skul ba mynta bad ba rim jong katei ka skul.

Kum ban shu kdew hangne, ia ka skul Little Flower Higher Secondary School, la seng ha u snem 1975, ha kaba ka jingthmu jong katei ka skul, ka long ban pynsaphriang ia ka jingnang jingstad sha ki shnong kiba don ha katei ka thain Mawbri lem bad ki shnong kiba iajan.

Kum kawei na ka shlem ai jinghikai sha ki khynnah, ka skul Little Flower Higher Secondary School, ha kine ki 50 snem jong ka jngiaid lynti, katei ka skul ka la nangkiew katba nangmih ki sngi ki por bad kaba la kylla long kum kawei na ki shlem ai jinghikai ba la paw ha Ri Bhoi Mihngi bad na katei ka skul, la mih shibun ki samla kiba la lah ban pyndep ha ki jingpule jong ki kyrdan bapher bapher.

Haba kren ha kane ka sngi, Conrad K. Sangma, ka sorkar ka ialeh shitom ban kyntiew ia ka pule puthi ha ka jylla, ka pule puthi kam dei ka kam kaba suk ban kyntiew wut wut, watla katta ka sorkar ka leh shitom ban kyntiew ia ka pule puthi.

U la ong ruh ha kine ki 10 snem duna, ka sorkar ka la leh shitom ban kyntiew ia ka pule puthi, kata da kaba pynbiang ia ki building lem bad kiwei ki jingdonkam ha ki skul.

Ha kiwei ki jylla, kata tang ha ki jylla shatei lammihngi, ki don ki skul shimet ba kim ju ioh jingiarap na ka sorkar, hynrei ka sorkar Meghalaya ka ju ïarap da kaba pynioh ia ki kynja grant bapher bapher, ha kaba hapoh ka shi snem, ka jylla ka pynlut kumba T.200 klur ban kyntiew ia ka pule puthi, kata lyngba ki skul shimet, ong u Conrad K. Sangma.

Ha kawei pat ka liang, u la ai jingiaroh ia ka Balang Catholic, kata naduh ki Missionary, ki Phadar, Brother, Sister lem bad kiwei, kiba la ialeh shitom na bynta ban kyntiew ia ka pule puthi, ym tang ha katei ka thain, hynrei ha ka jylla bad ha ka ri hi baroh kawei.

Lyngba jong katei ka sngi, u Conrad K. Sangma, u la pynbna ba un ai T. 25 lak sha katei ka skul, khnang ba kan ïoh ban shna ka ki building  kaba bit  ba biang bad kaba ban pynsuk ia ki khynnah kiba leit pule ha katei ka skul.