Nongpoh,Risaw 02: Ki Khun Samla ka Christian Endeavour Society ka Balang Presbyterian Saiden hapoh ka Ri Bhoi Synod  hynnin ka sngi ka 1 tarik Risaw ka la ioh ban pyniaid shakhmat ia ka jingrakhe ia ka Youth Week hashwa ban jam sha ka Jingrakhe ia ka Youth Sunday, ha kaba mynta ha kane ka sngi la sakhi ia ka jingiashimbynta kaba shitrhem jong ki khun samla kynthei bad shynrang ka Balang Presbyterian Saiden ha ka jingiakhun ia ka Futsal Football Tournament kaba Shisngi ba la pynlong da ka CE Society jong ka Balang ha ka madan Futsal ha Saiden.

Kumba ka theme jong kane ka Jingrakhe ia ka Youth Week bad Youth Sunday ka la kdew, ” Ki Samla Kiba Iaid Ha Ka Jingmang U Blei”, kumta ki samla ki la shimbynta ban pynsaphriang ia ka khubor jong ka jinglong iatylli, ka jingieid, jingshaniah bad ban sam ia ka khubor halor ka jinglong kongsan jong ka Koit ka Khiah haman la ki para briew kiba la thaw kyrpang da u Blei Trai Kynrad.

La sakhi ia ka jingiashimbynta jong ki samla lyngba ki kynhun lane House ba la jer kyrteng kum ka Juda A bad B, Jerusalem bad Samaria A and B hapdeng ki kynthei bad shynrang, ha kaba ka kynhun Juda A ka la ioh rah ia ka nam lahduh na bynta ki shynrang bad ka Samaria A ka la rah ia ka nam lahduh ha ka liang ki kynthei.

La wan ban ai mynsiem bad shimbynta lang ruh ha kane ka sngi da u Bah SF Lyngdoh, Adviser CE Society Saiden, u Bah Treiminot Mynsong, President CE Society ka Balang Saiden, ka Kong RB Lyngwa, kaba dei ka trai Madan nalor ki Pro Pastor bad ki nongsharai ka Balang Presbyterian Saiden.