Nongpoh, Risaw 06: Tang ka daw ka jingniah khlem akor bad ka jingbuaid u Dribar Trok, ki 2 ngut ki rangbah ki la duh noh ia la ka jingim kaba dei hadien ba katei ka trok ka la ryngkoh na shiliang sha Shiliang ka surok ban rat ia ka Kali Bolero kaba don ia u number ML-01-7455, ha kaba ki 2  ngut ki la khlad noh ha shen bad uwei pat u la mynsaw jur.

Kum ban pynkynmaw, kane ka jingjia ka la jia hynnin ka miet jong ka sngi u Blei ha ka por 8  baje ei ei janmiet ha ka Umsawnongkharai ba hap ha ka surok National Highway-6 ha Ri Bhoi.

La ioh lum jingtip, ba kitei ki 3 ngut ba wan na ka Bolero ka tnad Sport jong ka Resubelpara ki dang wan kiew sha Shillong na ka na ka bynta ban leit shaw ia ki ophisar jong ka tnad Sport bad na Agriculture, hynrei khlem poi pyrkhat ki mad ia kane ka jingjia ba sngewsih.

Ha kane ka jingjia, katei ka trok kaba don ia u number ML-05-L-4368 ka la rat naphang ia katei ka Bolero  sorkar haduh ba ka la pra phum bad ba la wan rah ka jingjia ba sngewsih ba u Dribar ka Bolero jong ka tnat District Sport office ka Rusubelpara, North Garo Hills u Sanbirth M. Momin bad u dribar ka tnad Agriculture Resubelpara u Smart Sangma ki la iap hashen bad uwei pat u paralok ba ia wan lang u Nikash M Monin u la mynaw jur.

U Dribar ka Trok la tip kyrteng kum u Anil Dorjee bad u nongbud jong u,  la tip kyteng kum Bibash Thapa, ha kaba baroh ar ngut ki la mynsaw ba la rah lang sha Civil Hospital Nongpoh ban ioh ia ka jingsumar.

Kumba la ioh lum jingtip na ki Pulit ka Ri Bhoi, la kynnoh ba u dribar katei ka Trok u dei uba la buaid katkum ka kaiphod ba la ai da ki Doctor bad la kynnoh ruh ba u la pynher sted bad niah khlem akor ia ka Trok haduh ban da poi sha u pud jong katei ka jingjia kaba sngewsih ban duh 2 ngut ki mynsiem ba kodor bad uwei u la mynsaw jur ha katei ka Bolero ba la shah rat ha katei ka Trok.