Nongpoh, Risaw 06: Haba kut ka lympung ialehkai phutbol ia kaba la pynlong da ka Mawbri Sport & Cultural Club, ha madan Mawbri, Ri Bhoi, ka Tyllilang Football Club, ka la rah ia ka namlahduh bad kata ka dei hadien ba ka la lah ban pynliem noh pyrshah ia ka Turshaphrang Football Club da 1-0.

Haba pynkut ia katei ka lympung ialehkai  ha ka sngi Saitjain, la sakhi da ka jingdon u Damanbait Lamare, MLA Umroi kum u kongsan, nangta u Bah Gody Hard Kharsamai, rangbah shnong Mawbri, kiwei ki rangbah shnong lem bad ki riew rangbah jong katei ka thain.

Khyndiat haba phai sha katei ka jingiakhun phainal, ka la dei shisha ka jingiakhun kaba iakhaid bad itynnah bha, namar kitei ki kynhun kiba la poi sha ka phainal, ki kwah ban khur ia ka namlahduh ha katei ka lympung.

Ha kaba kum katei ka jingiakhun phainal, ka Tyllilang FC ka la ioh ia ka kabu ban pynkhih jar bad pynlong syndon kum ka lahduh ha katei ka jingiakhun da kaba pynliem da 1 kol pyrshah ia ka Turshaphrang.