Shillong, Risaw 06: Ha ka jingiakynduh ia u Myntri ka tnad ka koit ka khiah bad ki heh doctor jong ka tnad ka koit ka khiah halor ka kam pule doctor ha ka jylla, ka Khasi Students Union sengkmie ka la kynthoh syndon ba ka jingpynrung kyrteng ha ka jingpule doctor ha ka jylla kam long kaba khuid kaba suba ha kaba poi pynban ka samla ba rit ia ki mark sha khmat bad ia ka samla Khasi kaba heh ki mark katkum ka merit list.

Haba kren sha ki lad pathai khubor, u President ka KSU Sengkmie u Samla Lambokstarwell Marngar bad u General Secretary ka KSU sengkmie u Samla Donald Thabah, ki la ong ba ka rukom thep kyrteng na ka bynta ban ioh bhah pule doctor kam long satia kaba khuid kaba suba bad la sakhi ba ka samla kaba ym dei trai jylla ka wan shakhmat ha ka merit list katba ka samla Khasi ba heh ia ki mark katkum ka merit list ka wan shadien.

Ki la pynpaw ruh kumba la pynshai da ka tnad ka koit ka khiah ba ki leh katkum kata ka SOP na ka Clause 9.6 ha kaba kum ka seng ka pyrshah jur bad ka la dawa ruh ban pynbeit thymmai ia ki kyrteng jong ki samla ba pule doctor, namar katkum katei ka List ba la buh da ka tnad ka koit ka khiah kam long satia kaba khuid kaba suba.

Ki la pynpaw ruh ba ki Samla Khasi-Jaintia ruh ki don ia ka hok ban rung ha ka open category ym tang ha ka Unreserved category, namar haba shim ia ki samla ba kwah ban pule doctor dei ban leh beit katkum ka merit list ha kaba kito kiba heh mark ki dei ban wan shakhmat bad ym kumba long ha kane ka list ba la pynmih da ka tnad ka koit ka khiah la wan pynban shakhmat da ka samla bar jylal kaba rit ia ki mark bad ka samla Khasi pat kaba heh ia ki mark ka wan shadien.

Shuh shuh, ki la ong ruh lada iaid katkum kane ka jingpynmih kyrteng ka sorkar halor ka jingpule doctor, ka pynduhnong ia ki samla trai jylla, namar kum ki samla ki don ia ka hok ban iaid da ka open category ne na ka Unreserved category kaba ngi dei beit ban shim katkum kata ka merit list lane ka jinglah jong ki samla pule ha ki mark jongki.

Khatduh eh, ki la bynrap ruh da kaba ong, ba ki sngewkmen pat ba u myntri ka tnad ka koit ka khia u Wailadmiki Shylla u la kular ba ka sorkar kan pynbeit thymmai ia ka kyrteng ha ka merit list katkum ka jingkyrpad ka KSU bad ruh ban dang bishar bniah ruh ia ka Clause 9.6 jong ka SOP, na ka bynta ban wan rah ia kata ka khuid ka suba ha kane ka kam pule doctor ki samla hapo ka jylla, ki la bynrap.