Nongpoh, Risaw 06: Ka jingjia aksiden kaba jur bad kaba sngewsih kaba la jia ha ka janmiet sngi u Blei ka 5 tarik Risaw, kala pynkthang mynsiem ïa ki bahaiing hasem hadien ba arngut ki briew kiba trei hapoh ka tnad sorkar kila duh noh ïa la ka jingim tang namar ka jingbuaid kyiad jong u nongñiah trok.

Kum ban shu pynkynmaw, kane ka jingjia kala jia ha ka shnong Umsaw Nongkharai, Ri-Bhoi District, haba kawei ka trok bala ñiah thurmur kala jam na shilliang sha shilliang surok haduh ba kala rat syndon ïa kawei ka Bolero jong ka sorkar kaba dang kiew sha Shillong. Kane ka Bolero ka dei jong ka ophis ka District Sports Officer, Resubelpara.

Kitei kiba la khlad noh ha katei ka jingjia ki kynthup ïa u Sanbirth M. Momin, u nongñiah kali jong ka ophis District Sports Officer Resubelpara, bad u Smarth Sangma, u nongñiah kali jong ka ophis District Agriculture Officer Resubelpara. Katba u Nikash M. Momin, uba dei u hynmen jong u Sanbirth, u la mynsaw jur ha katei ka jingjia u ba la wan ban synran lang bad kitei ki 2 ngut.

Ïa ki met jong kitei ki arngut kiba la khlad la pynkit noh mynta ka sngi sha North Garo Hills, hadien bala pyndep ïa ka post-mortem bad ïa ka jingleh niam ba khatduh hapdeng ka jingjaw ummat jong ki bahaïing hasem.

Naka liang ka ophis u District Sports Officer Ri-Bhoi District kala pynpaw ka jingsngewkhia bad ka jingsngewsih halor katei ka jingjia kaba khlem poi pyrkhat bad kala phah ruh ka khubor sngewlem sha ka ïing ka sem jong kitei kiba la khlad.

Nalorkata, u MLA ka Ampati Constituency, u Dr. Mukul Sangma, u la pynpaw ka jingsngewsih kaba jur bad pynrem tyngeh ïa katei ka jingjia, da kaba ong ba kane ka dei tang namar ka jingbuaid kyiad jong u nongñiah trok kaba la pynlong ïa arngut ki mynsiem ban duh noh ïa la ka jingim. U la kyntu ruh ïa ki bor ba dei peit bad ïa ki nongñiah kali ba kin shimkhia halor ka jingshngaiñ ha surok bad ban bud ryntih ïa ki aiñ ñiah kali ban lait na kino kino ki jingjia ba sngewsih..