Nongpoh, Risaw 07: Ki nongialam ka RBYF Byrnihat Circle, mynta ka sngi, ki la pynkup burom ia u Bah Sosthenes Sohtun, President barim ka RBYF Byrnihat Circle bad uba mynta u la long kum u MLA, MDC Jirang Constituency bad mynta uba la long syndon kum u Myntri Sorkar ka jylla Meghalaya.

Ia katei ka prokram ban pynkup burom ia u Bah Sosthenes Sohtun, la pynlong ha shnong Byrnihat, la sakhi da ka jingdon ki nongialam ka RBYF Byrnihat Circle bad ki nongialam ka RBYF Sengkmie, kiba kynthup ia u Bah Ricky Lapang, President RBYF Byrnihat Circle, u Samla Franky Rani, Vice-President, katba ki nongialam ka RBYF Sengkmie, ki kynthup ia u Bah Liander Nongshli, Working President RBYF Sengkmie, Bah Wanpher S. Wahlang, Publicity Secretary ka RBYF Sengkmie, u Bah Neversad Makdoh, Sports Secretary ka RBYF Sengkmie, ki nongialam Shnong lem bad kiwei.

Haba kren ha katei ka sngi, ki nongialam ka RBYF, ki la iaroh ia u Bah Sosthenes Sohtun, uba long mynshwa kum u President ka RBYF Byrnihat Circle, hynrei ka jingtrei shitom bad ka jingsngewrit jong u ban shakri ia ki paidbah, ka kyntiew ia u sha ka kyrdan MLA, MDC bad mynta lei sha ka kyrdan Myntri Sorkar, uba dei peit ia ka tnat C&RD, SAD bad GAD.

Katba u Bah Sosthenes Sohtun, haba u kren ha katei ka sngi, u la sngewnguh ia ka RBYF Byrnihat Circle, kaba la kynmaw bad pynkup burom ia u, uba la long teng kum u President ka Byrnihat Circle naduh u snem 2009 haduh u 2012 bad ha kitei ki por ba ka RBYF Byrnihat Circle, ba ka seng ka ieng rasong bha bad kaba ju trei na bynta ka jingmyntoi ki paidbah.

Nga long kumne kumba nga long mynta, ka dei na ka jingkyrshan bad ai mynsiem da ki para nongialam ka seng, kiba ju kyrshan bad ai mynsiem na ka por sha ka por bad khamtam eh ha ki por kiba mynshwa, ba nga dang long kum u President ka RBYF Byrnihat Circle.

Lyngba katei ka sngi, haba u kren kum u Myntri Sorkar, u Bah Sosthenes Sohtun, kum u nongialam barim ka RBYF, u la kyntu ia ki dkhot ka RBYF, ba ki dei ban bat ia ki lai tylli ki nongrim bad kita ki long, ba ki dei ban long kiba iatylli, kiba shlur bad ba ki dei ban long kiba don akor burom, ban pynduh ia ka mynsiem tharai sniew hapdeng ki para dkhot ka seng, kata na bynta ban iada ia ka bri u Hynniewtrep bad ban trei na bynta ki dawbah jong ka jaidbynriew.