Nongpoh, Risaw 08: Kum u Nongialam ka Liang Pyrshah (LOP) hapoh ka sorkar jylla, u Dr. Mukul Sangma hynnin ka miet ha ka por 12 baje ei ei u la sangeh ha Nongpoh, kaba dei hadien ba u la lap ba ki Pulit ka Ri Bhoi ha ka jingialam u Senior Superintendent of Police lem bad kiwei ki heh pulit ophisar ki dang talasi ia ki Kali ba pynkhein ain ha kaen ka surokbah, kaba ki pyrkhing bha na ki jingjia aksiden ba man ka por ba la ju wan rah ki jingjia ba sngewsih.

Kane ka jinglap u Dr. Mukul ka tyngkhuh ha ka por ba dang don lang ruh baroh ki heh pulit ophisar kiba dang pyndep ia la kam ram ban tehlakam ia kiba dribar ba buaid, kiba pynher sted bad kiba ym bud ia ki kyndon ain niah kali.

Ha kane ka jinglap u Dr. Mukul, ia ki bor pulit ba ki dang pyndep ia la ka kam ram, u la ai ka jingiaroh ia ki Pulit ka Ri Bhoi kiba la shim khia ban tehlakam bad u la pynpaw ruh ia ka jingsngewkhia halor ki jingjia ba sngewsih kiba la ju jia ha kane ka surokbah National Highway-6 ha Ri Bhoi ba bun ki mynsiem ba kordor ki la duh ia la ka jingim.

Shuh shuh, u la kylli ruh shaphang ka jingpyntreikam ia ka Trauma Centre ha Ri Bhoi na u SP ka Ri Bhoi bad u la pynpaw ruh ba un sa wan hiar sha Ri Bhoi  kaba u la pynpaw ka jingsngewkhia halor ka jingkhlad ki 4 ngut ha Thadrang bad ruh 2 ngut ki nongnihah kali sorkar na North Garo Hills dang shen kaba la jia ha Umsawnongkharai, kaba dei tang na ka daw ka jingdon ki dribar ba buaid.