Shillong, Risaw 09:  Kiba haïing jong u heprit ba dang 7 snem ka rta ba la tip kyrteng kum u Kyrshanbor Kharmyndai uba la jah na ka shnong Nongrah Shillong ha ka 8 tarik mynta u bnai ha ka por 4 baje ei ei janmiet bad mynta ka step la lap noh ia ka met jong u na jan kawei ka khlaw ha ka thaiñ NEIGRIHMS.

Kumba la ioh lum jingtip, la ong ruh ba la lap ia une u heprit harud surok ha Lum Rumnong, Mawpat ha ka por 10.30 baje mynta ka mynstep. Hadien ba la lap ia ka met une u heprit ki Pulit bad ka kynhun na Forensic ki la wan poi mardor sha katei ka jaka ban pynlong ia ka jingtohkit. Ki Bor pulit kim pat lah ban ithuh ia ka met jong une u heprit, ha kaba ki la ap haduh ban da poi kiba haïing bad dei hadien ba la wan poi kiba haing la pythikna ia ka met jong utei u heprit da kiba haïing.

Kum ban pynkynmaw, une u heprit u la jah na la ing ha ka por 4 baje ei ei janmiet haka 7 tarik u Risaw 2025, ha kaba la pynlong ia ka jingiawad paidbah da kiba haïing bad ki bor shnong ha kaba kim shym la lap satia, hynrei dei haduh mynta ka sngi la lap noh ia ka met ba la khlad jong utei u heprit harud surok najan kawei ka khlaw ha Lum Rumnong, Mawpat.

Hadien ba la lap ia ka met, na ka liang ki pulit ki la dang pynlong ia ka jingtohkit kaba bniah ban tip tynrai ia ka daw jong ka jingiap une u heprit bad ha kane ka sngi la wan poi syndon ruh da u SP ka East Khasi Hills u Bah Vivek Syiem ban pynlong ia ka jingtohkit.