Nongpoh, Risaw 09: U Bah Kynsaihunlang Nengnong, uba dei u General Secretary ka Ri Bhoi Youth Federation (RBYF) Sengkmie, u la khlad noh hynnin ka miet ha ka por 10 baje eiei mynmiet hapoh ka jaka shah sumar ha Apollo Excelcare Hospital Guwahati.

Kum ban shu kdew, u Bah Kynsaihunlang Nengnong, nalor ka kam kaba u bat kum u General Secretary ka RBYF Sengkmie, u dei ruh u briew uba ju trei ha ki kam shnong kam thaw bad uba long ruh kum u General Secretary ka Umroi Dorbar Pyllun.

Ka jingkhlad noh jong utei u nongialam ka RBYF, ka la wanrah ia ka jingsngewsih kaba khraw eh ia ki para nongialam hapoh ka RBYF bad ia ki dkhot ruh kumjuh, nalorkata ia ki para nongialam shnong ha ki shnong bapher bapher kiba don ha ka thain Umroi.

Ia u Bah Kynsaihunlang Nengnong, nyngkong la leit ban shah sumar hapoh ka Dr. H. Gordon Roberts Hospital ha Nongbah Shillong ha ka 30 tarik u Nailur, hynrei namar ba la jur ka jingshitom, ha ka 03 tarik u Risaw la pynkit noh sha Apollo Excelcare Hospital Guwahati, pynban ba la na ka jingjur ka jingshitom, hynnin ka miet ha ka por 10 baje eiei, la pynbna ba u la khlad noh na sla jong kane ka pyrthei.

U Bah Kynsaihunlang Nengnong, u la iehnoh shadien ia lai ngut ki khun bad ka Kurim, kumta ka jingleit ontep bad lehniam kaba khatduh ia u Bah Kynsaihunlang Nengnong, kan dei lashai ka 10 tarik hapoh ka shnong Umroi Madan.

Na ka liang u Bah Liander Nongshli, Working President ka RBYF ha ka kyrteng jong ka RBYF u la pynpaw ba kane ka jingkhlad noh u Bah Kynsaihunlang Nengnong kum u General Secretary ka seng, ka la long ruh ka jingduhnong kaba khraw ia ka RBYF, ha kaba kum ka seng ka pynpaw ia ka jingsngewsih kthang bad ka jingduhnong ha kaba kum u nongialam u la synniang shibun eh ban kyntiew ia ka seng bad ia ka Ri Bhoi District hi baroh kawei kum uta u nongialam uba shakri na kabynta ki paidbah ka them Ri Bhoi.