Nongpoh, Risaw 12: Ban wanrah ka jingïajan hapdeng ki nongrep bad ka sorkar, khamtam eh na bynta ban nangkyntiew ïa ka kam rep ha ki liang bapher bapher, ki heh nongïalam ka NPP Farmer’s Front, mynta ka sng, ki la hiar sha Umroi bad kata ka long ban pynskhem ïa ki nongïalam ka thymmai ka NPP Farmer’s Front Umroi Block.

Ïa kitei ki nongïalam ka NPP Farmer’s Front Umroi Block, la pynskhem ha Umroi Nongrah, ha kaba la sakhi da ka jingdon u Damanbait Lamare, MLA Umroi, nangta u Bah HM Shangpliang, u Bah Egenstar Kurkalang, kiba dei ki heh nongïalam ka National People farmers Front lem bad kiwei.

Haba kren ha katei ka sngi, u Bah HM Shangpliang, u la ong ba kum ka Party, ka NPP kwah ban pynkhlain ïa ka Farmer’s Front ha Ri Bhoi bad kata ka long ban ïoh pynshai sha ki paidbah kiba dei ki nongrep halor ki jingmyntoi ba kum ki nongrep ki dei ban ïoh na ka sorkar.

Shuh shuh, u la ong ruh kumba ka long mynta, ba ka NPP kan pynlong ïa ka jingpynrung kyrteng ïa baroh ki nongrep kaba la tip kum ka Farmer’s Enrollment Drive, kata ka long ban tip halor ka jingdon ki nongrep bad ruh ban tip ba ki dei ki nongrep kiba kumno bad kiwei ki jait jingrep ba ki rep ki riang.

Ki nongïalam kiba la pynskhem bad pynkup bor ba kin long kum ki nongïalam ka NPP Farmer’s Front Umroi Block, ki kynthup ïa u Bah Stephan Shadap kum u President, u Bah Jackler Rymbai kum u General Secretary lem bad kiwei kum ku Executive Members bad ki dkhot.