La Lap Ksai Ki Pulit Ïa Kiba Wan Buh Ïa U Bom IED Bad Shen Kin Sa Shah Kem
Nongpoh, Risaw 12: Ka jinglap ïa kawei ka pla ïong ba la suba ba u dei u Bom IED ha phyllaw ka ïing jong u Bah Nehlang Lyngdoh ha Umsning ka la pynher syrngiew ïa kiba bun ki paidbah nongshong shnong ka Umsning bad khamtam ïa kito kiba sahwai ha katei ka ïing bad ruh ki para majan ba kim poi pyrkhat ban don kita ki riew sniew kiba wan ban buh ïa u bom kaba long ka jingma ïa kiba bun ki mynsiem ba kordor.
Kane ka jingjia ka la jia hynnin ka janmiet jong ka sngi Saitjaiñ ha ka por 7 baje tam ei ei, ba ki bor pulit ka Ri Bhoi ki la ioh jingtip ba ka don katei ka pla ïong ba la suba ba don u bom bad na ka liang u heh pulit ka Ri Bhoi u la shim khia mardor ban leit sha katei ka jaka ryngkat kiwei ki heh pulit ban pynlong ïa ka jingtohkit bad ba la lap shisha ba ka don katei ka pla ïong ba la suba ba u don u bom.
Na ka liang u heh pulit ka Ri Bhoi u VS Rathore lem bad kiwei ki heh ophisar ym tang ba ki la pyntip mardor sha ki bomb Squad na shilling ban wan mardor sha katei ka jaka ban tohkit bad ban pynlip ïa utei u bom khnang ba nym don kano kano ka jingjia ba sngewswih, hynrei ki la poi ruh sha katei ka jaka ban ïa tohkit lang haduh ban da lap ba pynlip ne pynsniew noh ïa utei u kynja bom IED ba la lap na katei ka pla ïong kaba la buh ha katei ka phyllaw jong u Bah Nehlang Lyngdoh uba dei uwei na u heh sainpan bad u MLA barim ha ka jylla.
Kumba la sakhi, dei da ka jingwan poi mardor ki bom squad bad ki heh pulit ka Ri Bhoi ba la ïalam da u Senior Superintendent of Police u VS Rathore bad kiwei ki heh pulit ophisar, ki la pynlong noh ïa ka jingwad bniah bad ka jingtohkit kaba mardor bad ruh ba la lap shisha ba u dei u Bom IED ba la wan buh da ki riewsniew kiba ym lah ban tip satia.
Haba ïa kren sha ki lad pathai khubor u SSP Ka Ri Bhoi u VS Rathore u la pynthikna ba utei u bom ba la lap na katei ka pla ïong u dei u BOM IED uba la don ka jingkhia 4.7 kg, 100 tylli ki detonator bad 50 tylli ki lyngkhot nar barit ban pynbthei ïa kitei ki bom (Iron rod pieces as splinters).
U la ïathuh ruh da ka jingshim khia ba mardor na ka kynhun BDDS bad K-9 na Shillong ryngkat ka jingïatrei lang bad ki Pulit ka Ri Bhoi, la lah ban pynduh ne pynsniew noh ïa kitei ki Bom IED, khnang ba kan nym mih kano kano ka jingtieng ne ka jingma na ka jingwan buh ki riew sniew ïa utei u bom IED kaba buh jingma ïa ki paidbah.
Shuh shuh, u la bynrap ruh da kaba ong ba ka jingtohkit halor kane ka jinglap ïa kine ki Bom IED ka dang ïaid shaphrang bad ki la lap ksai ruh ïa ki briew ba suba ban wan buh ïa kitei ki bok bad shen ki Pulit ka Ri Bhoi kin sa ioh ban kem halor ka jingwan buh ïa utei u bom IED ha katei ka jaka, u la bynrap.