Kolkata, Jylliew 17:
Kumba 15 ngut ki briew ki la duh noh iala ka jingim, kynthup ia la lai ngut ki nongtrei jong ka Railway hadien ka jingtyngkhuh jong ki ar tylli ki rel hynne ka step marjan bad ka Rangpani Station jong ka jylla West Bengal. Kumba 60 ngut kiwei pat ki la mynsaw ha kane ka jingjia, hadien ba ka rel Kanchanjunga Express ka la shah tynrah nadien ha kawei pat ka rel kaba kit ia ki mar ki mata.
Kum ban shu kdew hangne, katei ka rel Kanchanjunga Express kadei kaba la mih na ka ka nongbah Agartala jong ka jylla Tripura ban leit sha Sealdah jong ka nongbah Kolkata ha West Bengal. U myntri rangbah ka jylla Assam, u Himanta Biswa Sarma u la pynpaw ia ka jingsngewkhia halor katei ka jingjia, kaba u la ong ba katei ka rel kadei kaba iaid lyngba jong ka jylla Assam bad lehse kin don bun ngut ki briew na ka jylla kiba don hapoh katei ka rel.
U Chairperson jong ka Railway Board, Jaya Verma Sinha haba kren sha ki lad pathai khubor u la iathuh ba kane ka jingjia kala jia ha ka por kumba 9 baje eiei mynstep bad kumba long mynta, ka jingwad bad ai jingiarap ia kiba ngat ha kane ka jingjia kala kut noh, bad baroh kiba shitom la pynkit noh sha North Bengal Medical College and Hospital na ka ba kin ioh ia ka jingsumar kaba bha tam.
