Guwahati, Jylliew 17:
U myntri rangbah jong ka jylla Assam, u Himanta Biswa Sarma hynnin ka sngi, ka 16 tarik jong u bnai Jylliew 2024, u la pynbna ba naduh ka 1 tarik u bnai Naitung, ki myntri sorkar bad baroh ki shakri sorkar jong ka jylla Assam ki hap ban siew hi na ka pla shimet ka jongki ia ka bai bording ilektrik ha ki jaka sah ba la ithuh da ka sorkar lane kata ka official residence.
Katei ka sienjam kaba la pynbna da u Himanta Biswa Sarma kadei kum shi bynta ban don ia ka jingkitkhlieh bad pyndonkam hok ia ka pisa jong ki paidbah. “Ngin pynkut noh ia kane ka jong VIP ban hap siew da ka sorkar ia ka bai bording ilektrik jong ki jaka sah ki myntri sorkar bad ki shakri sorkar da ka pisa paidbah. Ma nga shimet lem bad u Chief Secretary ka jylla, ngin long ka nuksa da kaba ngin siew ia ka bai bording naduh ka 1 tarik u Naitung shakhmat” la thoh u Himanta Biswa Sarma ha ka sla X ka jong u.
Utei u myntri rangbah ka jylla Assam la ong ruh ba ka sorkar Assam ka don ia ka thong ban pynduna ia ka rukom pyndonkam bording ilektrik da kaba pynmih ia prokram kaba thymmai kaban pynlip ia ka bording ilektrik hajan baroh ki jaka treikam sorkar naduh ka por 8baje janmiet, lait noh tang ka CM Secretariat, Home, bad ka tnad Finance. Kane ka sien, kaba la sdang ban treikam ha kumba 8 hajar tylli ki ophis sorkar, ki skul bad kiwei kiwei de, ka thmu ban pynduna da shibun shah ia ka rukom pyndonkam ia ka bording ilektrik.
“Ka jingthmu ka jong ngi, ka long ba suki suki, ngin pyrshang ban pynkylla ia baroh ki shlem treikam sorkar ban pyndonkam da ka bording kaba ioh na ka sngi, lane kata ka solar power, bad kumba long mynta ngi la sdang shwa ia kane ka kam lyngba ki Medical Colleges and skulbah ha baroh kawei ka jylla” la bynrap u Himanta Biswa Sarma.
Kane ka sienjam kaba la shim da ka sorkar Assam hapoh ka jingialam jong u Himanta Biswa Sarma ka ioh ruh ia ka jingiaroh na kiba bun ki paidbah, khamtam na kiwei de ki jylla ka thain Shatei Lam Mihngi kiba la kyntu iala ki jong ki sorkar ki jongki, ba kidei ban bud ia kane ka nuksa ban kiar na ka jingpyndonkam bakla ia ka pisa jong u paidbah.
