Shillong, Jylliew 17:
Ka kynhun ialehkai jong ka Real Friends Awro ka la ioh ban rah noh ia ka nam lahduh ha ka phainal jong lympung ialehkai phutbol kaba la pynlong da ka Federation of Khasi Jaintia & Garo People (FKJGP) Awro Area Unit jong ka South West Khasi Hills District. Ka Real Friends Awro ka ioh ban rah ia katei ka nam lahduh hadien ba ka lah ban pynliem noh 6 kol la 1 pyrshah ia ka kynhun ialehkai jong ka Nongrim Mawpat.
Ia kane ka lympung ialehkai phutbol kaba la pynlong ha ka sngi Saitjain ba lah dep ha madan Iawstian, la wan ban pynhap pyrda da u Bah Kenesjune L Nonglait, President ka FKJGP South West Khasi Hills District ha ka jingiadon ryngkat u Bah Balse Kharbani, General Secretary ka FKJGP South West Khasi Hills, u Bah Darling Thongni, Lyngdoh jong ka Kur Thongni lem bad kiwei kiwei de.
Khyndiat haba phai sha ka jingialehkai phainal ha kane ka sngi, ka Real Friends Awro ka ioh ban thep shwa 3 tylli ki kol ha ka kylla step jong ka jingialehkai. Ha ka kylla miet jong ka jingialehkai, wat lada na ka liang ka kynhun jong ka Nongrim Mawpat, ki la iakhun tyngeh ban pyn iaryngkat ki kol kumba la thep da ka kynhun Real Friends Awro, hynrei kim lah satia bad ioh ban thep tang 1 kol, katba ka Real Friends Awro pat ka la ioh ban thep biang haduh 3 kol. Lyngba kitei ki 3 kol ha ka kylla step bad 3 kol ha ka kylla miet, ka Real Friends Awro ka la pynliem noh ia ka kynhun ialehkai jong ka Nongrim Mawpat da 6-1 kol bad ioh syndon ban rah ia ka nam lahduh.
Na ka liang ki nongkren ha kane ka sngi ba kynthup ia u Bah Kenesjune L Nonglait bad u Bah Balse Kharbani ki la ai ka jingiaroh sha ka FKKJGP Awro Area Unit kaba la lah ban pynlong ia kane ka lympung ialehkai phutbol bad kyntu ruh ia ki khun samla bad ki rang ialehkai bad lada ki kwah ban kiew shaphrang ha ka jingim ka jongki, kidei ban minot thop, ban kiar na ki jingmlien kiba sniew kum ka kyiad, duma bad khamtam eh ia u drok, kiba dei ka dawbah jong ka jingjot kiba bun ki khun samla.
