Nongpoh, Jylliew 17:
Ha kawei ka jingjia hynne ka step ha ka por kumba 10 baje eiei, ki paidbah nongshong shnong jong ka Downgate, Nongpoh ki la lap ia kawei ka met jong u rangbah briew uba la 40 snem ka rta uba la phasi ialade hapoh ka kawei ka ingjah. Ia utei u rangbah la tip kyrteng kum u Suku Mejar.
Katkum ba la iathuh da ki briew shnong kiba iathuh ba utei u rangbah uba dei na katei hi ka dong jong ka shnong Nongpoh, udei uba la don saw ngut ki khun, hynrei um shym la sah ryngkat shuh bad ki, bad u dei uba shu leit trei bylla sngi katba iohei bad thiah kat shaba lap ba shem.
Ka jingkhuslai mynsiem, ka jingban jong ka duk, jingjynjar bad ka jingim kaba marwei lehse kadei kadaw kaba pynlong ia utei u rangbah ban pynkut noh iala ka jingim ha u tyllai phasi. Na ka liang ki bor pulit ki la wan ban pynlong jingtohkit halor kane ka jingjia bad ia u tyllai phasi ruh la law ha ryngkat ka jingdon lang jong ki bahaing hasem ban pynkit pat sha Nongpoh Civil Hospital, na ka bynta ban pyndep iaki jingdonkam katkum ki kyndon ain.
