Nongpoh, Risaw 19: Uwei u dribar Auto Rickshaw u la duh noh ia la jingim kaba kordor hadien ka jingjia ba sngewsih ka la jia mynta ka sngi, ba ka Auto Rickshaw kaba u niah ka la shah tynrah kynsan ha kawei ka Trok kaba la pynher sted bha bad ba la kynnoh ba la niah da u Dribar  uba la buaid kaba la jia ha Umling ba hap ha ka surokbah National Highway-6 ha Ri Bhoi.

Katkum ka tyllong khubor ba la ioh lum, la ong ba kane ka jingjia ka la jia ha ka por 3 shiteng janmiet mynta ka sngi u BLei, ha kaba ka trok kaba don ia u number AS 01 SC 8025 bad ba la niah da u Nidajan Niang uba la don 35 snem ka rta na Shangpung, West Jaintia Hills ka dang kiew sha nongbah Shillong bad  namar ka jingpynher sted palat ia ka trok um lah shuh ban tehlakam haduh ba u la leit tynrah ia katei ka Auto Rickshaw kaba don ia u number ML 10 D 0206 ba la niah da u Sibu Dey, 40 snem ka rta na Byrnihat bad ryngkat ka jingdon lang uwei pat ba la tip kyrteng kum u Rofiqul Islam na Assam ba ka Auto Rickshaw ka la hap sha Nala bad aktei ka Trok pat ka la kylla lyndang ha pdeng ka surokba.

Halor kane ka jingia, ki Pulit ka tnad Traffic na Nongpoh ki la hiar mardor sha katei ka jaka bgad la pynkit noh ia kiba mynsaw sha Civil Hospital Nongpoh bad kaba sngewsih ka dei hadien ba la poi ha katei ka jaka ai jingsumar ki Doctor ki la pynbna b u Dribar katei ka Auto Rickshaw u la dep khlad lypa bad utei uba shong lang pat u la mynsaw jur. La ong ruh ba u dribar ka trok um shym la mynsaw ei ei bad la lap pat ba u la dep dih buaid.  Na ka liang ki pulit ki dang pynlong ia ka jingtohkit kaba bniah halor kane ka jingjia.