Jowai, Risaw 22: Da ka mynsiem jong ka jingsngewkhia halor ka jingshah ktah ki nongrep ha ka Shnong Lapangap, kaba dei ka shnong khappud ha West Jaintia Hills kiba la shah khang ban lum ban lang ne ban ot ia u kba ha ki paid Karbi, ki nongialam seng bhalang na West Jaintia Hills naduh ka FKJGP, KSU, JSU bad kiwei kiwei ki seng mynta ka sngi ki la mih ban leit iarap ot kba ia ki nongrep na katei ka shnng Lapangap.

Ha kane ka jingleit iarap ot kba ki seng bhalang bad ban synran lang ia ki nongrep kiba ot bad lum ia u kba uba ki la rep shitom baroh shi snem la don lang ruh ki nongialam ka Synjuk ki Rangbah Shnong na West Jaintia Hills lem bad kiwei kiwei ki riew rangbah.

Ban pynthikna ban nym mih kano kano ka kynrum ka kynram ha kaba ki Nongrep ki la leit ot ia u kba ha ki pynthor kba, nalor kitei ki nongialam seng bad ki nongialam shnong la don ryngkat ruh naduh ki bor pulit bad ki bor magistrate na West Jaintia Hills.

Kum ban pynkynmaw, kane ka huri hura ne ka kynrum ka kynram ka la mih, ka dei ka jingiakynad kaba la mih hapdeng ki paid pnar bad ki paid Karbi bad ba la ju mih  ka jingiakynad pud kynad sam bad ha kaba ha kine ki kyndiat sngi ki nongrep na Lapangap ki la shah pynthud bad shah khang ban ot ne lum wat ia u kba u khaw uba ki la rep shitom baroh shi snem.