Shillong, Risaw 21: Ki Longïing kiba rep ia ia u jaid jingthung uba dih pynbuaid bad ba long beaiñ ba la ju tip kum u Ganja ha ka Shnong Laitlulong ba hap ha ka Hima Sohiong ki la shah ktah jur, kaba dei hadien ba mynta ka sngi na ka liang ka kynhun ki Pulit Anti Narcotics Task Force (ANTF), ki ophisar na ka tnad Excise, Forest, bad na ka Special Operation Team (SOT) ki la leit ban jynrat naphang bad pom ia kitei ki Ganja ba la thung da ki nongshong shnong katei ka Shnong.
La lei ban pynjulor bad pom lut ia kitei ki Ganja ba la thung da ki nongshong shnong ka dei ha ka jingialam u Block Development Officer ka Sohiong C&RD Block bad uba dei ruh u Magistrate ha ryngkat ka jigndon lang ki bor pulit bad kitei ki kynhun na ki tnad sorkar.
Na ka liang kitei ki kynhun Pulit bad ki ophisar ba la kot da ki spah ngut ki la leit rung syndon ha man la ki longïing ba rep ia utei u Ganja la ki dei ha phyllaw ïing ne ha kper bad ki la pom naphang ban pynduh ia une u Ganja uba dei u jaid jingthung ba pynbuaid bad uba la khein ruh kum u kynja jingthung ba long beaiñ,
Kumba la sakhi ha kane ka sngi, kaei kaba la pynlyngngoh ia kine ki ophisar sorkar ka dei ka jinglap ba ka jingthung ia une u Ganja uba dei u jingthung ba long beain ka jur bha ha katei ka Shnong ha kaba la long kumba ki rep ia ki jhur ki jhep.
Kumba kane ka shnong ka la bna nam bha ha kaba rep ia u Ganja, na ka liang kitei ki kynhun jong ka sorkar ki la leit ban pynjot bad pynjulor naphang da kaba pom bad jynrat ha man la ki jaka ba la rep ia utei u Ganja da kitei ki nongshong shnong.
