Nongpoh Risaw 23: Ka kynhun ki nongñiah kali ha ki lynti ïaid kiba khohruh khohram bad ki lum ki wah ïa kaba la tip kum ka Adventures Hynñiewtrep Off Roaders (AHOR), ka la shim biang ïa ka sieñjam ban pynlong ïa ka jingïakop ñiah kali ha ki lum ki wah bad ki lynti kiba khohruh khohram ïa kaba la tip kum ka 7th 4X4 Off Road Challenge ïa kaba la pynlong hapoh ka khlaw jong shnong Mawlyndep, Umiam, Ri Bhoi District.
Kane ka jingïakop ñiah kali ha ki surok khohruh khohram bad ki wah ki duid khamtam lyngba u surok u ba don bun ki jingeh ban ïaid, ka la long shisha kaba itynnad bad kaba la khring ïa ki paidbah nongpeit kai kiba la ïoh ïa ka jingbyrngia lyngba kane ka jingïakop ha kaba la sakhi ruh ïa ka jingïashim bynta da ki nongñiah kali kiba la triem na kylleng ki district jong ka jylla Meghalaya bad nabar Jylla kynthup na Arunachal Pradesh, Assam bad kiwei kiwei ki jylla.
Lah ban kdew ba ka AHOR kaba dei kawei na ka kynhun na kane ka jylla Meghalaya kaba la seng ha u snem 2015 bad kaba don ïa ka jingthmu ban kyntiew ïa ka sap ka phong jong ki samla kiba don shisha ïa ka sap nïah kali ha ki surok khohruh khohram lane ka Off-Road Sporting Challenge bad kane ka lympung ka dei ruh ka sien kaba 7 ha ka jingrakhe ia ka jingdap 10 snem jong ka kynhun AHOR.
Ïa kane ka jingïakop ñiah Kali la wan plie pyrda hi da u Bah Damian Umdor, u ba dei u President ka AHOR, nalor u Bah Ferdynald Kharkamni, Vice President, u Bah Ferdinand Jahrin, General Secretary, u Bah Robin Markhap ki dkhot bad kiwei kiwei ki riew pawkhmat.
Na ka liang ka kynhun AHOR ka la pynkhreh ruh ia ka song pisa kaba long 8 lakh tyngka kum ki khusnam sha ki nongjop ha ki jingiakop ba kynthup naduh ka Semi Modified, Pro Modified bad Stock kynthup ia ki trophies bad kiwei kiwei ki khusnam ia kaba yn sa sam ha ka sngi kaba Khatduh kata ha ka 25 tarik u Risaw 2025.