Nongpoh, Risaw 23: Hapdeng ka jingiphuh iphieng ka St. Paul’s Higher Secondary School Nongpoh mynta ka sngi kala pynlong ïaka prokram kyrpang, ka jingkynduh lang ki kmie ki kpa, ki khynnah skul, lem bad ki khynnah pule barim jong katei ka skul ban ïalehkmen khamtam ban ïa mir jingmut kumno ban dang pynjanai ïaka pule puthi bad ban kyntiew ïaka bha ka miat jong ki khynnah pule ha kum kane ka juk kaba la jur ki kam sniew.

Ïa katei ka prokram la pynlong ha phyllaw jong ka skul, ha kaba u Bah Mayral Born Syiem MLA ka Nongpoh u la shim bynta kum u kongsan, u Bah R Shadap, DSEO Ri-Bhoi District kum u symbud kongsan haka jingdonlang u Fr. Peter Syiemlieh, Parish Priest ka Nongpoh Parish, ka Rev. Sr. Angelina Ch. Marak, Headmistress ka St. Paul’s Higher Secondary School, ki nonghikai, ki kmie ki kpa lem bad ki khynnah skul.

Ha kane ka sngi naka liang ki khynnah skul da ka jingkmen kila shim bynta shitrhem ruh haki prokram bapher bapher naduh ka shad ka kmen, ki skit kiba ai jinghikai bad don jingmut bad kiwei kiwei.

Haba kren ha kane ka sngi u Bah Mayral Born Syiem u la ong ba kane ka dei ka sngi kaba sah jingkynmaw, kaba pynskhem ruh ïa ka jingïadei hapdeng ki kmie ki kpa, ki nonghikai, bad ki khynnah skul.

U la ong ruh ba ka skul St Paul’s Higher Secondary School naduh ki por ba mynshuwa ka dei ka skul kaba paw la ka long haka pule ka puthi, ki kam lehkai sports bad kumta ter ter kaba la pynmih ruh shibun ki soh bathiang kiba ki samla pule na katei ka skul mynta kila longbriew manbriew, wat hapdeng shibun ki jingeh bad ki jingpyngkiang ba kum ki bor pynïaid ki mad, hynrei kine kim shym la lehnohei namar ki khynnah ki lehbha bad pynkmen ïaki nonghikai lyngba ki result ba bha jong ki.

U la ong ruh ba ka sngi hi kaba pynkmen ïaki kmie ki kpa ka dei ka sngi ba ki khun ki iohpdiang ïaki result ba bha ba ka jingtreishitom jong ki bad ka jingjaw syep jawsnam jong ki ban pynbit pynbiang ïaki khun kam long lehnohei, lada ki khun ki leh tipsngi bad minot haki jingpule.

U la kyntu ruh ïaki khynnah pule ha kane ka sngi ba kane ka dei ka juk kaba bun tang ki kam sniew kam smeh ba kum ki khynnah skul ki dei ban tip ban kiar ïa kaba sniew bad ban jied ïa kabab ha bad ban pynlut por than bad ka mobile ruh haki kam ki bym don ka jingnohsynñiang haka pule ka puthi ka long ka bym don jingmut kumba bun naki khynnah mynta kim kheiñ snep shuh ïala ki kmie ki kpa kiba jaw ki ummat tang ban pynbit pynbiang ïaki khun tad haduh ba kin da kynduh mawsiang haka jingim jong ki ba ki sa sngewthuh ban kylla, namarkata kum u nongmihkhmat u la kyntu ruh ïaki khynnah bad kumjuh ruh ïaki kmie ki kpa kiba don lang ha katei ka sngi ba ka akor, ka jingsneng jingkraw naduh iing ka long kaba kongsan nalor ka jinghikai ba ki ioh na skul, khnang ba ki khun kin ïaid haka lynti kaba dei bad longbriew man briew haka jingim jong ki.