Nongpoh, Risaw 24: Kan long ka jingmyntoi kba khraw ia ki 47 tylli ki skul ha Ri Bhoi ha kaba shen kin sa ioh pdiang ïa ki painkhana kiba paka kyrpang tang na ka bynta ki khynnah kynthei, kaba dei hadien mynta ka sngi ka bor synshar District jong ka Ri Bhoi lyngba u Deputy Commissioner ka Ri Bhoi u Abhilash Baranwal ki la ia soi ia ka Memorandum of Understanding (MOU) hapdeng ka District Administration ka Ri Bhio bad ka Company Oil India Limited (OIL) ka ban ka ban pyntreikam ia kane ka projek ban tei ia kitei ki painkhana sha kitei ki skul.

Ha kane ka jingiasoi ia ka MoU la don ryngkat u Deputy Commissioner ka Ri Bhoi u Abhilash Baranwal, u Additional Deputy Commissioner u Raja Brahma bad na ka liang ka Company Oil India Limited la mihkmat da u Arun Jyoti Baruah Chief General Manager, Human Resources, Oil India Limited lem bad kiwei kiwei ki ophisar.

Haba ia kren mynta ka sngi  sha ki lad pathai khubor, u Deputy Commissioner ka Ri Bhoi, u Abhilash Baranwal, u la ong ba kane ka jingioh pdiang ia kitei ki 47 tylli ki Painkhana ban pynshna na ka bynta ki skul ka dei hadien dang shen na ka jingwan iuhkjat u Hardeep Singh Puri, u Myntri ka sorkar pdeng na ka Ministry of Petroleum and Natural Gas  ha Ri Bhoi District ba la kyrpad lem ia u ban pynioh ia kitei ki painkhana bad dei lyngba ka jingshim une u myntri ka sorkar pdeng u ba la btah ia ka Oil India Limited ban shim khia ia kane ka kam bad myntaka sngi la ia soi ia ka MOU na ka bynta ban tei ia kitei ki painkhana ha kitei ki 47 tylli ki skul.

U la iathuh ruh ba ia kane ka MOU la ia soi lyngba ka DRDA bad ka Oil India Limited ha kaba ka jingmang tyngka ka la poi haduh T. 72 lak tyngka ban tei ia kitei ki 47 tylli ki Painkhana kyrpang tang na ka bynta ki khynnah kynthei ha ki skul kiba ym pat don painkhana ia ki khynnah kynthei.

Shuh shuh, na ka liang u Deputy Commissioner ka Ri Bhoi u Abhilash Baranwal u la pynpaw ia ka jingkmen ba haduh 47 tylli ki skul kin ioh ia ki painkhana bapa na ka bynta ki khynnah kynthei bad kane ka long shi bynta ka jingmyntoi ia ki skul bad ruh ban wan rah ia ka koit ka khiah ki khynnah skul kynthei da ka jingioh ia kita ki Painkhana kiba paka bad ba la shna kyrpang na ka bynta jongki, u la bynrap.