Nongpoh, Risaw 24: Ban pynduna ia ki jingjia akiden ne ki jingjia ba sngewsih kaba la ju jan man ka por tang na ka daw ka jingpynkheiñ ki Dribar jong baroh ki  jaid Kali, ki Pulit ka Ri Bhoi mynta ka sngi ki la khyrwit naphang ban dain kuna ia ki Kali ba pynkheiñ ha kaba la pynlong ia ka jingkhynra ne talasi kali naduh na Byrnihat shaduh sha Jorobat.

Ha kane ka jingleit khynra ne talasi ia ki Kali ba pynkheiñ aiñ la ialam hi da u Senior Superintendent of Police ka Ri Bhoi u V.S Rathore bad u Additional Superintendent of Police u Bah Orville Massar lem bad kiwei kiwei ki heh ophisar bad ki Pulit na Ri Bhoi.

Kum ban pynkynmaw, naduh ba ki Pulit ka Ri Bhoi ki la shim khia ban tehlakam ia ki Kali ba pynkheiñ da kaba dain kuna naphang katkum ki kyndon jong ka aiñ, ngi lah ban sakhi ba ka jingjia ba sngewsih ne ki aksiden Kali ha Ri Bhoi ki la duna bha bad bun ruh ki dribar ki la sdang ban bud ryntih ia ki kyndon aiñ niah Kali  kaba la long kum ka jinghikai ne ka jingpynsngewthuh ba ka aiñ kan nym map iano iano lada ki pynkheiñ ia ki kyndon aiñ ñiah kali.

Ïa kane ka jingkhynra ne talasi ia ki kali kiba pynkheiñ aiñ naduh ka jingdih buaid u dribar, ka jingpynieng klumar ia ki Kali ha ka surokbah, ka jingbym deng ia ki Helmet ne ki Seatbelt, ka jingpynher sted ia ki Kali  bad ka jingbym don kot don sla  la sdang mynta ka sngi naduh ka por 3 baje janmiet kata naduh na Byrnihat shaduh sha Jorobat ha ryngkat ka jingdon lang kitei ki heh pulit ophisar ka tnad Pulit na Ri Bhoi.

La sakhi ruh da ka jingkhynra naphang ia ki Kali, bun ki Trok bad kiwei kiwei ki Kali ba pynieng beain ha surok bad kiba pynkhein ain ki la phet krad na katei ka surokbah bad na ka liang ki bor pulit ka Ri Bhoi ruh ha ka jingialam utei u heh pulit ki la dain kuna naphang ia ki Kali ba pynkheiñ aiñ khlem da map satia, kaba long kum ka jingai jinghikai ba ki hap ban bud ryntih ia ki kyndon jong ka aiñ haba niah ia ki Kali paidbah.

Haba kren sha ki lad pathai khubor, u Heh Pulit ka Ri Bhoi, u VS Rathore, u la ong kane ka jingkhynra kali na Byrnihat sha Jorobat ka dei hadien ba bun ki paidbah bad wat ki heh sorkar bapher bapher ki la ujor ba ka jingpynieng khlemakor ki Trok bad kiwei ki Kali ha ka surokbah ka la wan rah ka jingdheng kali bad ka la buh ruh ka jingma ia ki nongleit nongwan lyngba kane ka surokbah.

U la ong ruh ba ka jingkhynra kali ka dei  ruh naphang naduh kiba ieng khlemakor, kiba dih buaid, kiba pynher sted kali, kiba ym deng helmet ne Seatbelt bad kiba ym don kot don sla, namar tang na ka daw ka jingpynkhein ain bun ki jingjia ba sngewsih ki ju jia ha kaba na ka liang ka tnad Pulit ka la pyrkhing bha ia kane ka bynta ban shngain ki paidba ha ka leit ka wan lyngba jong kane ka surokbah.

U la buh ruh ka jingmaham ym tang ia ki trok ba ieng khlemakor bad wat ki trai dhaba bad Hotel ruh kim dei ban shah ieng klumar bad lada dang lap kin pyndonkam da ka Magisterial Power wat ban khang ruh ia kino kino ki dhaba ne ki hotel kiba ialeh pyrshah ba kum ka tnad Pulit kam kwah ban mih kino kino ki jingjia ba sngewsih.

U la kren shai ruh ba ka tnad Pulit ka sngewthuh ia ka jingshah ktah kiba shah dain kuna bad ki kham khein kor ia ka jingkordor jong ka jingim briew bad kino kino kiba pynkhein ain kin nym lait na ki kyndon jong ka aiñ.

Shuh shuh, u la ong ruh ba ka tnad Pulit na Ri Bhoi kan nym songthaid ba kan dang bteng ban pyrkhing ia kiba pynkhein ain bad kino kino kiba ialeh pyrshah kin nym lait na ka kuna kiba dei katkum ki kyndon ain bad kum ka tnad Pulit ka khot ka wer ruh ban iatrei lang namar kane ka jingpyrkhig ia kiba pynkhein ain ka la iarap shibun ha ha kaba mynta ki jingjia aksden bad ki jingjia ba sngewsih ki la kham duna naduh ba la tehpyrkhing ia kiba kali ba pynkhein aim, u la bynrap.