Nongpoh, Risaw 27: Ban pynurlong ia ki mat jingdawa ba la buh da ka Khasi Students Union (KSU), North Khasi Hills District Unit naduh u snem 2016 ha kaba ia dei bad shibun ki jingduna ha ka surok 4-lane na Jorobat sha Umiam bad mynta ka sngi la pynlong biang ia ka jingjurip ia kane ka surok ba la don ryngkat naduh ki nongmihkmat ka NHAI, ka bor synshar District, ki nongialam Shnong bad ryngkat ki nongialam ka seng kiba la ia wad bniah ia ki jingduna kiba donkam ban pynbit pynbiang ia kane ka surok.
Kane ka jingjurip ia kane ka surok bad ki jingdonkam ba dei ban pyntreikam da ka NHAI, ka dei ruh hadien ba dang shen ka Khasi Students Union, North Khasi Hills District Unit ka la dep ai biang da ka shithi pynkynmaw ia kitei ki mat jingdawa ba la phah sha u Deputy Commissioner bad sha ka National Highway Authority of India lyngba ka Ministry of Road Transports and Highways, ka sorkar India.
Ha kane ka jingjurip la don ryngkat naduh Assistant Commissioner ka Ri Bhoi u Akash Marak, u Consultant ka NHAI u Krishna Gutty, u President ka KSU North Khasi Hills u Bah Ferdynald Kharkamni, ki nongialam ka shnong Nongpoh, Mawdiangum bad Iewmawlong ryngkat ki dkhot ka KSU bad kiwei kiwei ki riew rangbah.
Ki mat jingdawa ba hakhmat eh ba la buh da ka KSU ki kynthup ia ki 7 tylli ki jingkieng iaid kjat, ban buh ia ki bor jingshai ha ki jaka ba long paidbah, ban pynbiang ia ki nala um ba ju mat ka jingshlei um ha ka por slap bad ban buh ruh ia ki zebra line ne ki rumble strip ban shngain ki paidbah ha ka leit ka wan bad ruh shibun ki jingdonkam ban pynitynnad ia ka sor Nongpoh.
Lyngba kane ka jngjurip kaba mynta ka sngi, ka nongmihkhmat na ka NHAI ki la ai por ban pyndep ia ka kaiphod hapoh ka 31 tarik mynta u bnai na ka bynta ban pyntreikam ia kitei ki jingdawa bad ka jingkular na kitei ki nongmihkmat ka NHAI ban shim khia kane ka kam ka la ai m ynsiem ia ki nongialam ka KSU bad ruh ia ki nongialam Shnong ba kin wan kita ki jingkylla kiba long ka jingshngain bad ka jingmyntoi na ka bynta ki paidbah ha Ri Bhoi.
Haba ia kren bad ki nongthoh Khubor, u President ka KSU North Khasi Hills District Unit, u Bah Ferdynald Kharkamni, u la ong ba kane ka jingleit jurip mynta ka sngi ka la ai jinghun ia ka seng bad ruh ia ki nongialam shnong, namar na ka liang ki nongmihkhmat ka NHAI ki la ai ka jingkular ban pynsted ia ka kam halor kitei ki jingdawa jong ka seng kiba dei halor ka jingpynbit pynbiang ia ki jingdonkam ha kane ka surokbah ka ban long ka jingshngain na ka bynta ki paidbah.
U la ong ruh ba ki mat kiba hakhmat ba la kular da ka NHAI bad ba ka senng ka dang ap ia ka kaiphod haduh ka 31 tarik u Risaw 2025 ki kynthup ia ki 7 tylli ki jingkieng iaid kjatm kata 2 tylli ha Byrnihat, kawei ha Umling, 2 tylli ha Nongpoh, kawei ha Umsning bad kawei ha Mawlein Mawkhan bad nalor kata kynthup ruh ban pynheh ia ki nala um ba ju jia ka jingshlei um na ka daw ka jingrit ki Nala, ba buh ia ki bor jingshai ha ki jaka paidbah ha sor Nongpoh bad kynthup ruh ban buh kita ki Zebra Crossing ne ki rumble Stip ban shngain ki paidbah ba leit ba wan.
Shuh shuh, u la bynrap ruh ba kum ka seng ka ap ia ka kaiphod bad ka khmih lynti ruh kumba la kular da ka NHAI kan pyndep kloi noh ia kine ki mat jingdawa kiba long ka jingshngain na ka bynta ki paidbah ha kane ka surkokbah bad nalor kata ka seng kan dang iai buddien haduh ba kine ki jingdawa kin sa urlong bad ruh ba kan long kata ka jingshngain ia ki paidbah haba ki iaid ki ieng lyngba kane ka surokbah ha Ri Bhoi, u la bynrap.
