Nongpoh, October 28: Da ka jingshim khia ki bor pulit ka Ri Bhoi hadien ba la ioh pdiang ia ka ejehar ha ka 11 tarik u Risaw 2025 ba kawei ka khynnah kynthei ka la jah na ka thain Byrnihat bad hadien ba la dep ban register case ha Nongpoh Women Police Staton katkum ka Case No. 25(06)2025 u/s 140(2)/3(5)/61(2)/87 BNS r/w Section 5(1)(A) of Immoral Trafficking (Prevention) Act ha ka jingshim khia u UBI Michael R Marak kum u Investigation Officer la lah ban pynlait im noh ia katei ka khynnah kynthei na ka thain Byrnihat ba la ialam da ki runar sha Rajasthan.

Katkum ka kyrwoh na ki Pulit, la ong ba ia kane ka khynnah kynthei la lap na Rajasthan, ha kaba ka la ioh lad ban phet na ka jaka ba set ia ka bad da ka jingiarap ki Pulit ka Rajasthan bad ryngkat ka jingiateir lang ki Pulit na Ri Bho la lah ban pynlait im ia ka bad la wan rah ruh sha Meghalaya.

Ha ka jingtohkit hadien ba la lah ban pynlait ia kane ka khynnah kynthei, la ioh jingitp ba u briew na Assam u la pynbeij lyngba ka Facebook bad u la khot ban leit sha Delhi bad Rajasthan ban ia shong kurim, hynrei ia kane kane ka khynnah kynthei la ialam da utei u briew sha Rajasthan ha kaba  u la die noh ia ka ha ka dor kaba T. 3 lak tyngka sha u briew uba kam shym ithuh satia.

Dei lyngba ka jingtohkit jur bad ka jingbuddien ki Pulit, la ioh ia ka jingithuh ia une u briew ba pynbiej ia kane ka khynanh kynthei ba la tip kyrteng kum u Rajesh Hinge (31), uba dei North Tripura bad u la shah kem noh ha ka 19 tarik u Risaw 2025 na Guwahati bad lyngba ka jingbteng ka jingtohkit la ioh ban kem sa ia 2 ngut ba la tip kyrteng kum u Md. Khalil Ali (31), na Boko, Kamrup(R) District, Assam uba la shah kem ha ka 21 tarik u Risaw 2025 na Jhalukbari bad kawei pat kaba don bynta ha khmat eh ha kane ka kam rah bor la tip kyrteng kum ka Monica na Jhunjhunu, Rajasthan kaba la shah kem ha ka 26 tarik u Risaw 2025 na Kamakhya Railway Station.

Ka khubor na ki Pulit ka la iathuh ruh  baroh kine ki 3 ngut ba la ioh kem la pynlong ia ka jingtohkit kaba jur bad la ioh jingitip ruh kumba ki la phla tang hapoh 2 snem ki la die haduh 5 ngut ki khynnah kynthei tang ka thain Boko Assam bad iwei pat na Tripura. Ka jingtohkit ka dang iaid shakhmat bad la khmih lynti ruh bun kin dang sa shah kem halor kane ka jingdon kti ha kine ki kam rahbor ia ki khynnah kynthei.

Shuh shuh, la iathuh ruh ba kine ki runar ki leh ia kine ki kam rah bor da kaba pynbiej ia ki khynnah kynthei da kaba pyndonkam ha ki Facebook bad Instagram bad hadien ba ki la ioh lad ban ia text lyngba kitei ki rynsan social media ki pynbiej ba ialam sha Delhi, Haryana, Rajastan bad kiwei kiwei ki jaka bad hadien kata pat da khongpong ki die kylla ia ki ha ka dor kaba rem. Kumta na ka liang ka tnad Pulit Ri Bhoi ka kyrpad ia ki kmie ki kpa, ki khynnah ba ki die ba long kiba peitngor ha kine ki kam pynbien bad kim dei ruh ban click klumar ia kino kino ki link ba kine ki briew kin pyndonkam bakla ban leh ia ki kam beain kum ka cyber fraud, UPI fraud bad kiwei kiwei ki kam sniew.