Nongpoh, Risaw 29: Ban wan rah ia ka jingthungkam thungkam kaba khuid bad kaba suba hapoh ka District lyngba District Selection Committee ha Ri Bhoi, ka Federation of Khasi Jaintia and Garo People (FKJGP), North Khasi Hills District mynta ka sngi ka la pynher syndon da ka dorkhas ha ka ophis u deputy Commissioner ka Ri Bhoi ban dawa pyntreikam halor ki mat ba donkam ha ka jingthungkam thungjam hapoh ka District lyngba ka DSC.
Ha ka jingialam u president ka FKJGP North Khasi Hills District Unit u Bah Luistar Lyngdoh lem bad ki dkhot nongialam mynta ka sngi ki la kynduh syndon ia u Secretary ka DSC bad ruh uba dei u Additional Deputy Commissioner ka Ri Bhoi u Raja Brahma ban pynpaw halor kitei ki mad jingdawa ka seng bad ruh ban aiti ia ka dorkhas na ka bynta ban kyrpad ban pyntreikam ia kitei ki mat jingdawa ka seng ha ka liang ka thungkam thungjam ha ka District lyngba ka DSC.
Kitei ki mat jingdawa ba la buh da ka FKJGP North Khasi Hills District Unit ki kynthup ban pynpaw paidbah ia ka Answer Key bad ki Marks jong kito ki samla ba ia khun ban ioh kam ha ka official website jong ka District, ban pynpaw ruh ia ka kyrteng jong ki Kyrtong kiba la rung sha ka Personal Interview bad sa kawei pat ban pynbna paidbah kham kloi lada don kino ki post kiba lait ha ki tnad sorkar bapher bapher ha ka District kaba dei ban iaid lyngba ka DSC.
Haba kren shad ki lad pathai khubor, u President ka FKJGP North KHasi Hills u Bah Luistar Lyngdoh bad u General Secretary u Bah Ricky Majaw, ki la ong ba ka daw kaba la pynlong ia ka seng ban buh ia kitei ki mat jingdawa ha ka liang ka thungkam thungjam, ka dei ka jingangnud ban don kata ka jingkhuid ka jingsuba ha ka liang ka ai kam ka ai jam kaba dei katkum ka jinglah jong kito ki kyrtong kiba ia khun ha ki post bapher bapher ka DSC.
Ki la ong ruh ki jingdawa ba hakhamt ki kynthup ban thad paidbah ia ki Answer key, ki mark ba ioh khur da ki kyrtong ba wad kam bad ruh ban thad ia ka kyrteng jong ki kyrtong kiba ioh rung sha ka personal interview, khnangba kane kan iarap shibun ban wan rah ia ka jingthungkam thungjam kaba khuid kaba suba bad ruh ban iarap ruh ia ki samla ba kin dang pyntbit ia lade ha ki la ioh ban bishar bniah biang ia ka jinglah jong ki lyngba ka Answer key.
Namarkata, na ka liang kitei ki nongialam ka FKKJGP ki kyrpad jur ia ka ophis u Deputy Commissioner ka Ri Bhoi ba kin shim khia lem halor kitei ki mat jingdawa ka seng bad ka seng ka khmih lynti ruh ban lah ban pyntreikam ia kitei ki mat ba la dawa khnang ban wan kata ka jingthungkam thungkam kaba khuid kaba suba, kaba dei katkum ka jinglah ki kyrtong wad kam ha ka examination thungkam thungjam, ki la bynrap.