Nongpoh, Risaw 30: “ Ki VDP ki don ka bynta kaba khraw bha ha ka imalang ka sahlang ban pynduhjaid ne iada na ki kam sniew ba bun jaid kiba ktah ia ka shongsuk ka shongsain ki paidbah ha ka imlang ka sahlang” ong u heh pulit ka Ri Bhoi u VS Rathore.

Haba ia kren bad ki nongthoh khubor mynta ka sngi, u VS. Rathore kum u SSP ka Ri Bhoi, u la ong ba ka tnad Pulit na Ri Bhoi ka ai khublei kyrpang ia ka sorkar jylla naduh u Myntri Rangbah ka jylla, u Myntri ka tnad ka kam pohïing bad ka DGP ka jylla, ha kaba ka sorkar jylla ka la pynkiew ia ka jingmang pisa (Allowances) na ka T. 300 shi bnai sha ka T.3000 shi bnai sha man la ki VDP ha ki shnong hapoh ka jylla bad kane ka dei ka jingpynshlur ban don ka jingiatrei lang ki VDP bad ki Pulit na ka bynta ban pynduhjaid ia baroh ki jaid jingsniew kiba don ha ka imlang ka sahlang.

U la ong ruh ba ka tnad Pulit ka lah ban seng ia ki VDP ha man la ki shnong lyngba ka jingpynkupbor ka Meghalaya Police Act bad kumba long haduh mynta na ki 600 tylli ki shnong ha Ri Bhoi kumba 300 tylli ki Shnong ki la pyntreikam biang ia ki VDP da kaba thep kyrteng ha ka tnad Pulit ha Ri Bhoi.

U la ong ruh da ka jingpynim ia ki VDP ha Ri Bhoi ka dei ka thong ban ia trei lang bad ki Pulit na ka bynta ban pynduhjaid ia ki kam sniew kum ka jingshah ban bein ki kynthei ki khynnah bad kiwei kiwei ki kam sniew kiba pyntieng pynsyier ia ka imalng ka sahlang.

“Tang ki Pulit kin nym lah ban shakri sha baroh ki shnong kiba don ha Ri Bhoi, hynrei da ka jingdon ki VDP kane kan iarap ia ka tnad Pulit ban ioh jingtip lada don kino kino ki kam sniew ha ki shnong ki thaw bad khamtam ki VDP ki tip kham bha ha la ki shnong lada don kiba leh kam sniew bad tang kawei ki dei ban pyntip mardor sha ki Pulit khnang  ba lah ban leh katkum ki kyndon jong ka ain” ong u VS Rathore.

Shuh shuh, u la ong ruh ba ka tnad Pulit kan dang trei shitom ban pynrung kyrteng baroh ki VDP kiba don ha ki shnong jong ka Ri Bhoi bad ka thong hi ka long ban ia trei lang bad ki VDP ha baroh ki bynta jong ki kam kiba long ka jingshngain ia ki paidbah bad ruh ban iada na kiba bun ki kam sniew kiba ktah ia ka shongsuk shongsain ki paidbah ha ka District hi baroh kawei”  u la bynrap.