Nongpoh, Risaw 30: U heh pulit ka Ri Bhoi u VS Rathore mynta ka sngi u la kren shai ba ka tnad Pulit kan nym map la ki dei ki VIP ne ki dei ki paidbah bad kino kino kiba pynkheiñ aiñ kin shah pynhap beit katkum ki kyndon jong ka aiñ aiñ.

Haba kren sha ki lad pathai khubor, u Senior Superintendent of Police ka Ri Bhoi u VS. Rathore, u la ong ba ka sorkar ka la dep ban bthah ban tehlakam ia ki kali ki heh ki hain (VIP) kiba pyndonkam bakla ia ki Kali bad ka sorkar ka la shim khia bha ban tehlakam ia kino kino kiba pynkheiñ ain.

U la ong rung dang shen ki paidbah ki la sakhi ba ka jingtehlakam ka dei satia tang ia ki kali paidbah bad wat ki kali jong ki heh sorkar ne kita ki VIP ruh ki ngat lang ha ka kuna, haba ki la pynkhein ain bad la leh ruh ia  kane shi bynta ban nym pyndonkam bakla ia ka bor kaba ktah pat ia ki paidbah ha ba iaid ba ieng lyngba ka surokbah.

“La ki dei ki Kali ki heh sorkar ne ki kali ki paidbah bad kino kino kiba leh bakla ne pynkheiñ kyndon kin ngat beit ha ki kyndon aiñ” ong u VS Rathore bad bynrap ruh na ka liang ka tnad Pulit kan dang iai pyrkhing ha ba ki kali ki iaid ha ka surokbah bad ka jingpyrkhing ia kiba leh bakla ka long ban iada na kino kino ki jingjia ba sngewsih ne ki jingiatygkhun kali kaba ju jia tang na ka daw ka jingpynkhein aiñ” u la bynrap.

U la ong ruh ba kane ka jingpyrkhing kam dei tang ia ki heh sorkar ne ki kali paidbah bad wat ia ki Kali jong ki Pulit ruh kin ngat beit ha ka aiñ lada ki pynkhein aiñ. U la ong ruh na ka liang ka tnad Pulit ka la dep ruh ban bthah sha man ki pulit ophisar jong ki Police outpost ne Police Station ba ki hap ban bthah wat ia ki Pulit lajong ban bud ia ki kyndon ain bad kiba pynkhein hi la ki dei ki riew paidbah ne ki heh sorkar kin nym lait satia na ka kydon jong ka ain.

Shuh shuh, u la ong ruh ba ka tnad Pulit ka la dep ruh ban btah ym tang ia ki Pulit ba  kin tehpyrkhing ia ki kali ba pynkhein ain bad ka kyrpad ruh wat ia ki paidbah ba lada ki lap ia kino kino ki Kali ba pynkhein ain kin pyntip mardor sha ki Pulit lane ki lah ban shon dur ne ring video khnang ban lah ban dain kuna katkum ki kyndon jong ka ain, u la bynrap.