Shillong, Naiwieng 01: Ka long shisha ka jingkyrkhu iaka jylla Meghalaya ba kan dang lah ban kyntiew ia ki kam jngohkai pyrthei ha kaba myntaka sngi u Myntri ka sorkar pdeng ba peit ia ka tnad DoNER u Jyotiraditya Scindia  bad u myntri rangbah ka jylla u Conrad K. Sangma ki la plie paidbah ia  u Mawnongrim ban tei ia ka Integrated Development of Sohra Tourism Circuit ha Sohra ha ryngkat ka jingdon lang u Myntri ba dei peit ia ka tnad Tourism ka jylla u Timothy D. Shira, u Myntri ba dei peit ia ka tnad Sport u Bah Wailadmiki Shylla bad u Myntri ba dei peit ia ka tnad Art Culture u Bah Sanbor Shullai.

Kane ka projek ka dei kaba projek kaba la mang haduh Rs. 233 klur tam, ha kaba la buh thong ban dang pynkhlain ia ki kam jngohkai pyrthei bad ruh ban dang khring shuh shuh ia ki nongwan jngohkai pyrthei sha ka jylla Meghalaya khamtam ka Sohra kaba dei kawei na ka jaka kaba don ia ka bor ban khring ia ki briew kiba na shabar ban wan shang pyngngad ha kane ka jylla.

Kane ka projek ka dei ruhba ka la mang lyngba ka Ministry of Development of North Eastern Region (MDoNER), jogn ka sorkar India bad lyngba kane ka projek kin kham ban khia ban kyntiew iaka roi ka par bad ruh ban kyntiew kyrpang ia ki kam jngohkai pyrthei kiba long ki jingkyrshan ia ka jingim jong ki nongshong shnong ka thain shatei lam mihngi ka ri India lyngba ki kam jngohkai pyrthei.

Kiwei kiwei kiba la don lang ha kane ka sngi ki kynthup ia u MLA ka Shella u Bah Balajied Kupar Synrem, u MLA ka Sohra u Bah Gavin M. Mylliem,u Chief Secretary u Dr. Shakil Ahammed bad kiwei kiwei ki heh sorkar rygnkat ki paidbah nongshong shnong ka thain Sohra.

Haba kren ha kane ka sngi u Myntri ka sorkar pdeng ba peit ia ka tnad DoNER u Jyotiraditya M. Scindia, u la ong ba kane ka projek Integrated Development of the Sohra Tourism Circuit, kin long shi bynta ki dak ki shin bad ki matti jong u Myntri rangbah ka ri India u Narendra Modi ban kyntiew ia ka ri India lyngba ka jingkyntiew shwa iaki kam pynroi ha ki jylal shatei lam mihngi ka ri India.

U la ong ruh ka PM-DeviNE Scheme kaba la wan rah da ka sorkar pdeng kam dei satia tangban poi ki kam pynroi ha man la ki kyndong kynshrot jong ka ri, hynrei kane ka Projek ba la wan rah ha Sohra kam dei tang ban shna ia kita ki jaka ba pynitynnad bad ka dei ruh ban saindur ia ka ioh ka kot ki nongshong shnong lyngba ki kam jngohkai pyrthei.

Shuh shuh, u la pynpaw ruh ia ka thong jong ka sorkar pdeng na ka bynta ban kyntiew ia ki jylla shatei lam mihngi ka ri India bad u la ong ruh ha ka jingialam u Myntri rangbah ka ri u Narendra Modi ka la pynkiew ruh ia ka mang pisa na ka bynta ka Northeast na ka Rs. 36,000 crore ha u snem 2014 bad mynta la pynkiew haduh Rs. 1,00,000 crore bad Rs. 50000 crore la mang kyrpang na ka bynta ki surok ban pynpoi sha ki shnong nongkyndong ka Northeast.