Nongpoh, Naiwieng 01:Khnang ban don ka jingiaithuh ithaw hapdeng ki samla pule Khasi ha ka sor bah Guwhati jongka jylla Assam kiba leit ban wad jingstad ha ki jingpule bapher bapher, ka Khasi Jaiñtia Students Union, Guwahati kum kawei na ka kynhun seng ba peit ia ka bha ka miat ki samla Khasi mynta ka sngi ka la pynlong da ka jingiakynduh lang ki samla Khasi ba la tip kum ka Khasi Jaintia Students Union Fresher meet ba la pynlong ha Shilpgram, Panjabari Road, Six Mile, Guwahati.

Ïa kane ka lympung ia kynduh lang ki samla Khasi kiba pule ha Guwhati la wan ban shim bynta da u MLA ka Mawhati u Bah Charles Marngar kum u kongsan bad u Bah Trebor Suchiang kum u symbut kongsan. Kiwei kiwei kiba la ia don lang ki kynthup ia u President ka Hills Farmers Union u Bah Comander Shangpliang, Ladapborlang Mawrie Adviser ka KJU, u Mountain Dkhar President ka Khasi Jaiñtia Students Union, Guwahati, u Samla Kaiman Sayoo General Secretary, Khasi Jaiñtia Students Union, Guwahati lem bad kiwei kiwei.

Ban pynpaw, ka Khasi Jaintia Students’ Union (KJSU), Guwahati, kaba la seng naduh u snem 1973 ka ju trei mon sngewbha naka bynta ban kyrshan lane ai jingiada naka bynta ki samla pule khasi leit ban wat jingstad naki shlem ai jinghikai kiba don hapoh ka sorbah Guwahati.

Kum kawei na ka thong ba la ju leh man la u snem ban wan rah ia kata ka jingiatylli bad ka jingiatrei lang ki samla Khasi kiba pule ha ka jylla Assam, ka Khasi Jaintia Students Unon mynta u snem ruh ka la pynlong biang ia kane ka lympung ia kynduh lang jong ki samla pule kiba la pule lypa bad kiwei pat ki samla pule kiba dang wan pule thymmai kum ka dak ban tehsong bad ban ia trei lang na ka bynta ka jingbit jingbiang bad ka bha ka miat ki samla Khasi kiba pule ha Guwahati.

Lyngba jong kane ka sngi, shuwa ban sdang katei ka lympung iakynduh lang la leh burom ruh ia u (L) Dr. D.D Lapang kum uwei u nongialam ba radbah ka jylla, da kaba ki la pynlong ia ka jingsngap jar ba shipor ban ai burom halor u synñiang u bynhei uba la kyntiew ia ka jylla. Ha kane ka sngi la sam ruh ia ki khusnam sha ki katto katne ngut ki riew don sap bad ki samla kiba la len lada ban trei na ka bynta ka jingbha ki samla Khasi bad la pynphuh pynphieng ruh ia kane ka lympung da ki jingrwai, ki jingshad bad ka put ka tem da ki samla pule.