Nongpoh, Naiwieng 02: Kawei ka trok LPG kaba don ïa u Registration Number MN 03 D 3342 mynta ka sngi u Blei kala kylla syndon bad hap ha kawei ka jaka ba lang um ha rud surok haka shnong Umtrew ha Ri-Bhoi District.

Katkum ka jingtip bala ioh lum la ong ba kane ka trok LPG la ñiah da u Priyo Kumar Singha na Assam ka dang kiew sha Nongbah Shillong hynrei ynda poi ha katei ka jaka, katei ka trok kala kylla don bala suba ruh ba dei naka jingpynher sted palat.

Ha katei ka jingjia u nongñiah katei ka trok u la mynsaw jur bad la pynkit noh sha Umsning CHC ban ioh ïaka jingsumar bad naka liang ki pulit ka Umiam PS ki dang pynlong ka jingtohkit halor katei ka jingjia.

Shuh shuh ki pulit kim pat nud pynkhih ïa katei ka kali, hynrei ki dang ap ïaka jingpeit bñiah da ki riew shemphang jong ka LPG la ka don ne em ka jinglaitlyer ne pei ïaka tyndong ba kit katei ka trok.