Nongpoh, Naiwieng 03: Ki nongialam ka Hills Farmers Union (HFU) Sengkmie ryngkat ki nongialam na Ri Bhoi District mynta ka sngi ki la leit syndon ban kynduh ia u Deputy Commissioner ka Ri Bhoi u Abhilash Barwanwal bad ruh ia ka District Veterinary Officer, ka Ri Bhoi kaba dei halor ka jingsngewkhia na ka jingiap khlam ki Sniang ha Ri Bhoi ba la suba ba ka dei kaba shah ktah na ka khlam African Swine Fever (ASF).

Ha ka jingialam u General Secretary ka HFU Sengkmie u Bah Alforsebirth Kharsyntiew bad la synrang lang ruh da u President ka HFU Ri Bhoi u Bah Ronald Khongjoh bad u Secretary ka HFU Ri Bhoi u Bah Pynshai Masharing ryngkat ki dkhot mynta ka sngi ki la leit kynduh ia kitei ka District Veterinary Officer bad ruh ia u Deputy Commissioner na ka bynta ban pynsngew ia kane ka jingshah ktha ki nongrep kiba ri sniang ha Ri Bhoi.

Ha kane ka jingleit kynduh ia kitei ki ophisar ka District, ki nongialam ka HFU ki la aiti ruh ia ka dorkhas ban kyrpad jur na ki bor synshar District ban shim khia halor kane ka jingshah ktah ki nongri Sniang ha Ri Bhoi.

Kawei na ka mat ba hakhamt eh ba la buh da kane ka seng, ka dei ban don ka khyrdop talasi ia ki jingri ba wan poi na shabar jylla naduh ki Sniang, ki Masi, ki syiar bad kiwei kiwei ki jingri, namar ka jingbym don ka khyrdop ka la long laitlan ban wan poi kitei ki jingri sha kane ka jylla bad kaba ktah pat ia ki nongrep ha kane ka jylla.

Haba ia kren bad ki Nongthoh Khubor, u General Secretary ka HFU Sengkmie, u Bah Alforthbirth Kharsyntiew, u la ong ba kum ka seng ki nongrep ka la shim khia ia kane ka bynta ka jingshah ktah ki nongrep, ka dei hadien ba bun ki nongrep ki la pyntip halor ka jingiap khlam ki Sniang ha bun tylli ki shnong ha Ri Bhoi, ha kaba kane ka la buh jingeh ia ki nongrep khamtam kito kiba shim ram lyngba ka Piggery Mission naei kin siew ia ka rap haba ki jingri ba ki ri ki la iap noh.

U la iathuh kumba la pynsngew sha u Deputy Commissioner bad sha ka District Veterinary Officer ka  Ri Bhoi, ka seng ka ban jur ba hap ban shim khia halor kane ka jingiap khlam ki Sniang ha Ri Bhoi bad kane ka lah ban ktah na ka jingwan poi ki Sniang kiba na shabar kiba khlem da don ka jingpeit jingkmih da ki Doctor kiba dei peit ia kane ka kam. Ka jingeh pat ka dei ia ki nongrep kiba ri sniang ha kaba lada da ki phew tylli ki sniang kin iap mano ban bah khlieh ia ka jinglut jingsep ba shah ktah ki nong ri Sniang.

Shuh shuh, u la ong ruh ba ka seng kumba ka la kyrpad ia u DC bad ka DVO ban shim khia halor kane ka jingshah ktah ki nongrep ha Ri Bhoi bad ha ka jylla, ka seng ka la rai ruh ban leit kynduh ia u Myntri ka tnad Animal Husbandry and Veterinary Department ban ia kren halor kane ka phang bad khamtam ka seng kan dawa ban buh da ki khyrdop ban talasi ne eksamin shuwa ban wan rah ia ki mrad kiba wan poi na shabar lyngba ki Doctor khnang ba kane kan nym ktah ia ki nongrep ka jylla, u la bynrap.