Mawkyrwat, Naiwieng 03: Ki 5 ngut suba runar ba la kynnoh ba ki dei na ka kynhun GNLA ki la ngat ha ka shrip jong ki Pulit ka Mawkyrwat, kaba dei hadien ba ka tnad Pulit ka ka ioh pdiang ia ka ejehar ba la ujor pyrshah ia kitei ki dkhot ka GNLA kiba la don kti ban dawa pisa bad ruh byrngem byrsit da kaba phone da  ki number bym lah ban ithuh.

Kane ka jingioh kem ki Pulit ia kitei ki 5 ngut ki dkhot ka GNLA (Regroup), ka dei lyngba katei ka ejehar ba la register case ha Nonghyllam Police Station kaba dei katkum ka Case no. 15(10)25 U/S 308(2)/351(4)/3(5)/113(3)(5) jong ka BNS.

Ka kyrwoh ba la ioh lum na ki Pulit la ong, ba dei lyngba ka jingbuddien ia katei ka ejehar ba la ioh pdiang bad ruh lyngba ka jingioh pdiang ia ka jingtip ba bniah, ki Pulit ka Ranikor Circle bad ka kynhun Special Cell ki Pulit na Mawkyrwat ki la buddien bad twet haduh ba la ioh kem nymong ia uwei u suba don kti ha kane ka kam ba la tip kyrteng kum u Mann R. Marak (25) na South West Khasi Hills  bad bud sa ka jingioh kem ia ki 4 ngut kynthup ia uwei uba dang rit ka rta.

Kiwei kiba la ioh kem na ka jingtohkit na utei uba la shah kem ki kynthup ia u Marson R. Marak (18) na Rajapara, South West Khasi Hills, u Tartus N. Marak (20)  na Mulapat, South West Khasi Hills  bad u Babulin D. Sangma (27) na Upper Rajapara South West Khasi Hills  bad ia ka kyrteng jong utei u ba dang rit ka rta la buhrieh noh.

Shuh shuh, ka tyllong khubor ba la ioh lum na ki Pulit, la ong ba na ka liang ki Pulit ki la dang pynlong ia ka jingtohkit kaba jur bad ruh ban tohkit na ka bynta ban dang lap ksai ia kiwei pat ki dkhot ba la kynnoh ba ki don kti ha kaba pynim biang ia kane ka kynhun ehrang GNLA (GNLA Regroup).