Nongpoh, Naiwieng 04: Haiden ka jingshim kabu da uwei u bar jylla ia ka kyrteng shnong khlem da ioh jingbit da ka dorbar Shnong, ka Dorbar Shnong Mawkyrdep ba hap ha ka Raid Madan Kyrdem ha Ri Bhoi ka la ujor syndon da ka ejehar pyrshah ia uwei u bar jylla uba la pyndonkam bakla ia ka kyrteng shnong  ban ai da ka kyrteng shnong ia ka ophis treikam jong u khlem da ioh jingbit da ka Dorbar Shnong.

Haba ia kren bad ki Nongthoh Khubor, u Rangbah Shnong ka Shnong Mawkyrdep, u Bah Jibansius Ramshon u la ong ba ka Dorbar Shnong Mawkyrdep ka la pynpaw ia ka jingsngewkhia kaba jur, halor ka jingshim kabu da uwei u bar jylla ban ai da kyrteng shnong ha kata ka ophis treikam jong u, kaba khlem da ioh jingbit na ka Shnong.

U la iathuh ba une u bar jylla uba pyndonkam bakla ia ka kyrteng shnong u dei uba la tip kyrteng kum u Samson Prakash, uba dei uta u Founder lane u Board Adviser  jong kawei ka tnad treikam jong u kaba la ai kryteng, ‘Jingkyrmen’ da kaba ai ia ka Address jong ka Shnong Mawkyrdep, Umroi Ri Bhoi, ba kum ka shnong kam shym la ai bor satia.

Halor kane ka bynta, na ka liang u Bah Jibansius Ramshon kum u Rangbah Shnong u la ong ba ka Dorbar Shnong Mawkyrdep a pyrshah jur halor kane ka jingshim kabu une u bar jylla bad na ka liang ka Dorbar Shnong kumba ka la dep ban ujor da ka ejehar ka kyrpad jur ruh ia ki bor Pulit ban  pynshitom ia une u bar jylla katkum ki kyndon jong ka ain.