Nongoh, Naiwieng 04: Kum ka jingphai khmat sha ki samla ki bym don kam don jam ha kane ka juk kyrduh kam kyrduh jam bad kiba la biang pat ki kyrdan pule, ka Federation of Khasi Jaintia and Garo People (FKJGP) Baridua Circle ki la leit ban buh syndon da ka jingthoh sha ki ar tylli ki Hopital kiba paw ha ka thain ban kyrpad ia ki bor pyniaid ba ki dei ban phai khmat shwa sha ki samla trai shnong kiba ym donkam don jam ha kitei ki jaka ai jingsumar.
Kine ki ar tylli ki jaka ai jingsumar ba la leit ban ai jingtoh da ka seng FKJGP Baridua Circle ki kynthup ia ka P.A Sangma International Hospital and College kaba don ha Baridua 9 mer bad ka ARHI hospital kaba don hapoh ka shnong Mawsmai 11 mer hapoh ka Raid Marwet ha Ri Bhoi District.
Ha kane ka jingleit ban da ka jingtoh sha kitei ki Hospital, ki nongialam ka seng nalor ba ki la aid a ka jingtoh ban pynpaw ia ki jingdawa bad ki la ioh ruh ba ia kren bad ki bor pyniaid kitei ki jaka ai jingsumar ba kynthup ia u Director ka ARHI U Bah Aibor Nongsiej, bad u Principal ka PIMC U Abhinandan Das na ka bynta ban kyrpad lem ba kin phai khmat sha ki samla katei ka thain kiba ym don kam don jam.
U General Secretary ka FKJGP Baridua Circle u samla Alan Donald Sohpdang, u la ong ba ka daw kaba la pynlong ia ka seng ban ia kren sha kitei ki jaka ai jingsumar, ka dei halor ka nongrim ba ka seng ka lap ba don bun ki Samla Khasi-Jaintia bad Garoi kiba la pyndep ia ki kyrdan jingpule bapher bapher, hynrei ki hap ban shong khlem kam khlem jam bad na kane ka daw kum ka seng ka leit ban ai jingtoh kyrpang na ka bynta ban thungkam ne phai khamt kyrpang shwa sha ki samla Khasi-Jaintia bad Garo ha kitei ki jaka ai jingsumar.
U Samla Alan Sohpang ha kawei ka bynta u la pynpaw iaka jingsngewhun haba la ioh ban ia kren bad ki bor pyniaid kitei ki jaka ai jingsumar kiba la kular ban iarap kyrpang ia ki samla ban thungkam thungjam ha kitei ki jaka ai jingsumar bad khamtam u la pynpaw ruh ka jingsngewnguh kaba kham khraw ia ka ARHI Hospital kumba ka seng ka la sakhi ba bun kiba trei ha ki post bapher bapher ki dei ki Samla Khasi-Jaintia bad Garo kiba ioh kam ha kane ka ka jaka ai jingsumar.