Nongpoh, Naiwieng 04: Ka Ri Bhoi Youth Federation (RBYF) Sengkmie mynta ka sngi ka la leit ban pynsngew syndon sha u Deputy Commissioner ka Ri Bhoi na ka bynta ban pyntreikam noh ia ka aiñ Meghalaya Residents Safety Security Act (MRSSA) – 2016 ha Ri Bhoi District bad ha kawei ka bynta ka la pynsngew ruh sha u Deputy Commissioner halor ka jingpyntreikam ia ka skhim Saubhagya kaba dei ka skhim ba la buh thong ban pynpoi bording ilektrik ha man la ki longïing.

Ha kane ka jingleit kynduh ia u Deputy Commissioner ka Ri Bhoi u Abhilash Baranwal la ialam da u president ba rangbah ka RBYF u Bah Bipul Thangkhiew ha ryngkat ka jigndon lang u Adviser u Bah Augustien Sten lem bad kiwei kiwei ki nongialam bad ki dkhot ka RBYF Sengkmie.

Haba kren sha ki lad pathai khubor, u President ka RBYF u Bah Bipul Thangkhiew, u la ong ba ka RBYF ka la leit ban kynduh mynta ka sngi ia u Deputy Commissioner ka Ri Bhoi, ka dei halor ki ar tylli ki mat jingdawa kata ban pyntreikam ia ka ain MRSSA 2016 bad ruh ban pyntreikam noh ia ka Entry bad ka Exit Point. Nalor kata ka ka seng ka la kren ruh halor ka skhim Saubhagya ba ka sorkar Meghalaya lyngba ka kynhun ki Minister ka la pynduh noh ia kane ka skhim ha ka 12 tarik September 2025 ba kum ka seng kam sngew iahap namar lada peit ia ka jingpynshai u Myntri rangbah ba ha Ri Bhoi ki don sa tang 17 tylli ki shnong ha Ri Bhoi kiba ym pat poi bording ilektrik.

U la ong ruh ba katkum ka jingtip ka seng na ki 600 tylli ki shnong ha Ri Bhoi kiba pyntreikam ia ka skhim Saubhagya ka dei tang ha ki bynta jong ka Eastern Ri Bhoi bad mynta pat ka sorkar India ka la thmu ban pyntreikam sa ia kata ka skhim RDSS ban bujli ha ka jaka jong ka skhim Saubhagya.

Shuh shuh, u la kren ruh halor ka ain MRSSA ha kaba ka seng ka angnud ban pyntreikam noh khnang ban tehlakam ia ki briew kiba wan rung na shabar sha ka jylla, ka dei halor ka nongrim ba naduh u snem 2013 ki 13 tylli ki seng ha ka jylla ki la dawa ba pyntreikam ia ka ILP bad dei ha u snem 2019 ka ïingdorbar thaw ain jong ka jylla ka la pdiang ban pyntreikam iakane ILP bad mynta ka sahkut ha ka parliament ha kaba kum ka seng ka angnud ban pyntreikam noh ia ka ain MRSSA kata naduh ka District task Force Committee ban pynkup bor ia ki rangbah shnong bad kumjuh ruh ia ka Entry bad ka Exit Point ha kaba la sakhi ba la pyntreikam nanduh ka 3 tarik u October 2016 bad ym shym la lah pat ban pyntreikam pura kumba la sakhi la plie iaka Entry Point ha Umling bad ba la thoh shai ruh halor ka jingdon ka Facilitation Centre kaba ym pat treikam haduh kine ki sngi.Ujor Ejehar Ka Shnong