Nongpoh, Naiwieng 05: U Bah MG Kharshanlor kum uwei naki rangbah naka them Ri-Bhoi ba shong ba shong ba sah haka shnong Saiden, u ba ju trei kam paidbah, mynta ka sngi hapdeng ka jingkmen kaba khraw lem bad ka iing ka sem kila ioh ban aiti noh ïa kawei ka jaka sum ba paka sha ka jaka ri khunswet ki kynthei jong ka Ri-Bhoi Presbyterian Synod Children’s Home (Girls) haka shnong Mawsyntai ha Ri-Bhoi District.

Ha kane ka sngi ka jingplie bad aiti ïa kane ka jaka sum kaba paka bala pynbiang laka jong ki kamra, nalor u Bah MG Kharshanlor ryngkat ka kurim bad 2 ngut ki khun, la don ryngkat ruh ki pastor ka Ri-Bhoi Synod naduh u Rev HL Myrsing President SELDA, Rev. RK Marsing Moderator Ri-Bhoi Presbyterian Synod, Rev DS Roy Muktieh, Rev. BB Markhap, ka kong Darisha Mallai Superintendent katei ka jaka ri khunswet bad kiwei kiwei.

Ha katei ka juh ka sngi naka liang ka Synod kala ioh ruh ban plie paidbah syndon ïaka ophis treikam jong katei ka jaka ri khunswet haka shnong Mawsyntai ba ki nongtrei kin ioh ban pyntyllun ïaki kam ki jam jong ki.

Haba kren ha kane ka sngi naka liang u Bah MG Kharshanlor ryngkat ka jingjaw ummat ban kynmaw ïala u jong u kpa bala khlad noh, u la ong ba u Blei u la kyrkhu ïa u haka jingïaid lynti jong u ïa u mawmer ba 50 snem mynta u snem bad kum uwei naki rangbah haka sngi ba u dap snem u la leit jngoh ïa katei ka jaka ri khunswet ban leit rakhe lang ha katei ka sngi bad dei ha katei ka jingleit jngoh u la lap ba katei ka jaka ri khunswet kam don satia ka jaka sum ba kyrpang khamtam ba kidei ki kynthei suda kumta dei ha katei ka sngi kaba la ktik ïaka jingmut jong u ha kaba u la shong pyrkhat bad la ka kurim ka kong Vericonia Kharbhih ba u kwah ban lei eiei haka sngi dap 50 snem kaba dei ka 20 tarik Ïaiong hadien ba u Blei u la kyrkhu ïa u lyngba kam ki jam, ka koit ka khiah lem bad 2 ngut ki khun bad rai syndon ban pynshna da ka jaka sum kaba paka naka bynta ki khunswet ha katei ka Children’s Home.

U la pynpaw ruh ka jingsngewkmen kaba khraw watla ka jingshna ïa katei ka jaka sum ka shim por kumba katto katne por hynrei ainguh ïa u blei bala lah ban pyndep noh ïaka bad aiti syndon wat hapdeng shibun ki jingeh bad ki jingtynjuh jong ka jingïaid lynti ka jingim, hynrei haba phaidien pat u la iohi ba u Blei u la kyrkhu shibun ïaka jingim bad ki kam ki jam jong u bad ngeitskhem ba u Blei un pdiang watla ka dei ka kam kaba rit ryngkat ka jingkyrmen ba skhem ba u Blei un dang plie lad plie lynti ïaka jingim jong u ba shakhmat bad kane ka long ruh kum ka khubor lyngba kane ka sngi ba sah jingkynmaw ba katei ka jaka ri khunswet ka dang donkam shibun ki jingïarap ban pynbit pynbiang ïaka.

Naka liang ka Ri-Bhoi Synod lyngba ki pastor bala don ryngkat ha katei ka sngi kila pynpaw ka jingsngewkmen kaba khraw ïaka jingdon mynsiem utei u rangbah u ba dei ruh u khun jong ka Balang ban nohsynñiang da ka jaka sum sha katei ka jaka sah ki khunswet ki khun rangli kiba khlem kmie khlem kpa ryngkat ki jingduwai ba u Blei un dang kyrkhu ïaki sngi ki rta jong utei u rangbah ba un dang lah ban trei bad kamai ryngkat ka koit ka khiah ba un dang lah ban shakri bad ban leh shibun ki kam isynei sha kiba donkam ka jingïarap bad ka imlang ka sahlang.