LAP U SAMLA PULE ENGINEER DA U BSEIN BA LA IAP HA KA JINGBAM PACKET HA BIHAR GOVERNMENT ENGINEERING COLLEGE

Bihar, Jylliew 18: Ha kawei ka jingjia kaba la pynpaw niang khriat ia kiba bun ki samla pule, u wei u samla pule Engineering hapoh ka Bihar’s Engineering College, u la lap da u bsein ba la iap bad pyut hapoh ka jingbam kaba la sam hapoh ka kamra bam jong katei ka College.
Katkum ka khubor ba la iohlum, la iathuh, kumba 10 ngut ki khynnah ki la kem pang kynsan bad shah sumar ha ki hospital ha Bihar namar ka jingpang kpoh lane Food Poisoning bad ka dur jong u bsein ba la lap ha ka jingbam jong u samla pule ka la saphriang bha mynta ha ka Internet.
Ha kane ka dur, la sakhi, ba u wei u bsein ba la iap ka la per ha ka jingbam jong u samla pule Engineer ha Bihar Engineering College ba la sam ha ka kamra bam jong kane ka College ia kaba la pynsaphriang ruh ha ka rynsan Social Media jong ka X da u Rishi Singh.
Ha katei ka rynsan Social Media X, u Rishi Singh, u la iathuh, ba u bsein ba la iap la lap ha ka jingbam jong u wei u samla pule Engineer hapoh ka Government engineering College Banka, Bihar.
La iathuh ruh, ba tang mar ia bam ia kane ka jingbam, u ne u samla pule u la kem pang prie pynhiar, watla ia kane ka jingjia la pyntip sha ki bor ba dei khmieh jong kane ka College hynrei ym shem don kano kano ka jingshimkhia halor katei ka jingjia, ka la buh jingma ia ka koit ka khiah jong ki samla pule hapoh kane ka College.
“Watla na ka por sha ka por, ki samla pule ki ju ujor sha ki bor ba dei khmieh jong kane ka College halor ka jingiai lap ia ki khniang ne kiwei kiwei ki jait bym long bam ha ki jingbam ba ju sam sha ki samla pule na ka por sha ka por, hynrei ki bor ba dei khmieh kim shimkhia satia ne wat ban pynshitom ia ki nongshet ne nongsam bam ha katei ka kamra sam bam ia ki samla pule”, thoh u Rishi Singh.
Kum kine ki jingjia kem pang ki khynnah pule ka la iai jia ha ka jylla Bihar, ha kaba dang shen kumba 23 ngut ki khynnah ki la khlad noh tang namar ka jingsniew jong ka bam ha kaba biang ruh ha ka midday meal ba la sam ha kawei ka Government School ha Chhapra.