IAP JYLLOP 4 NGUT KI HEPRIT SHIPARA HA WAH KUANO, KATBA DANG WAN LEHKMEN EID

Uttar Pradesh, Jylliew 18: 4 ngut ki heprit kiba dei shipara naka shnong Kalu Bankat jong ka jylla Uttar Pradesh kila ngam jyllop ha kawei ka wah Kuano kaba hap ha Balrampur District. Kitei ki heprit la tip kyrteng kum ka Reshma (13), Afsana (11), Guddi (9) bad Lalli (7).
Katkum ka tyllong khubor bala ioh lum la ong ba kitei ki heprit ki dang wan lehkmen ïaka Eid-al-Adha na iing jong ka mei ieid jong ki na Rehra Bazar, bad kila leit ruh sha katei ka wah ban leit sum, hynrei namar ka jingjylliew jong ka um kim lah shuh ban mih shabar bad ngam jyllop syndon ha katei ka wah bad naka liang ki pulit bad ki paidbah kila sei noh ïa ka met jong kitei ki heprit ban pyndep ïaki jingdonkam bad ki jinglehñiam ba khatduh.