Nongpoh, Naiwieng 16: Ka long shisha ka jingkyrkhu bad ka jingkmen ïaki paidbah ka Jirang Constituency hadien ba u Myntri Rangbahduh ka Ri u Narendra Modi lyngba ka Video Conference hynnin ka sngi u la buh mawnongrim ban tei ïaka skul Eklavya Model Residential School (EMRS) haka shnong Umsohbar ka shnong khappud ka Meghalaya bad Assam kaba hap ha Jirang Constituency.
Ïa katei ka skul yn tei haka jinglut kumba 64 klur lyngba ka Ministry of Tribal Affairs jong ka sorkar India.
Ha kane ka sngi ba u Myntri Rangbahduh ka Ri U Narendra Modi u plie mawnongrim ban tei ïa katei ka skul, naka liang u Bah Sosthenes Sohtun MLA ka Jirang ba dei ruh u Myntri ka sorkar jylla hynnin ka sngi u la sakhi lang ïa katei ka jingbuh mawnongrim lyngba ka Video Conference haka jingïalang bala pynlong ha Jirang C&RD Block.
Lah ruh ban kdew hangne ba katei ka skul ka urlong ruh dei hadien ba u Bah Sosthenes Sohtun ha kine ki khyndiat snem bala leit noh u la phah ruh d aka jingthoh sha ka sorkar jylla bad hadien ka jingioh jingmynjur la pyndep ruh ïaka jingjurip ïaka jaka ban tei ïa katei ka skul.
Naka liang u Bah Sosthenes u la pynpaw ruh ka jingkmen kaba khraw bad ka jingsngewnguh ïaka sorkar pdeng bad kumjuh ruh ïaka sorkar jylla ba dei namar ka jingshimkhia jong u Conrad Sangma kum u Myntri Rangbah ka jylla hadien ba katei ka jingkyrpad jong u ban ioh noh kawei ka skul EMRS ha Jirang Block kala urlong ka ban long ka jingmyntoi kaba khraw ïaki paidbah ka thaiñ khamtam katei ka dei ka skul jong ka sorkar pdeng ka ban pynmyntoi ïaki khun ba duk ba rangli bad ïa katei ka skul la khmih lynti ruh ban pyndep hapoh 36 bnai.
