Shillong, Naiwieng 19: Ka Sorkar Meghalaya kala rai ban shim hi iaka jingkitkhlieh ban phah sumar iaki 2 ngut ki samla pule NEHU kiba la mynsaw jur namar ka jingshah syllad haka kali ba niah da u dribar ba shoh khawiang.
Ia kane ka pyntip da u Symbud Myntri Rangbah ka Jylla u Bah Sniawbhalang Dhar hadien ba wan jngoh iaki 2 ngut kiba dang shah sumar ha Nazareth Hospital Shillong.
Haba kren sha ki lad pathai khubor u Bah Sniawbhalang u la iathuh ba u la bthah iaki bor pyniaid ka Nazareth Hospital ban leh iaka ba donkam ban pyntikna ba ki samla pule ki ioh iaki lad jingsumar ba paka.
U la iathuh ba u la dep ban iakren bad ki baha iing hasem jong ki samla bad u la pyntikna iaki ba ka Sorkar kan shim iaka jingkitkhlieh haba iadei bad ka jinglut jingsep ban sumar iaki khun jong ki.
“Kadei ka kamram jong ka Sorkar ban pyntikna ba ki samla pule ki ioh ka jingsumar ba tista khnang ba kin ioh noh iaka met kaba koit ba khiah” la ong u Bah Sniawbhalang.
U Symbud Myntri Rangbah u la pyntikna ruh baka Sorkar Jylla ka kloi ban phah sumar ia baroh 2 ngut ki samla sha bar Jylla lada ki dang donkam ka jingsumar ba khambha shuh shuh.
U la ban jur baka Nazareth Hospital ka don iaki lad jingsumar ba paka hynrei u la bynrap daka ba ong “Lada donkam ka Sorkar kan bah khlieh hi ban phah sumar iaki sha bar Jylla”.
U Bah Sniawbhalang u la iathuh ruh ba iwei napdeng jong ki, i la kham biang hynrei iwei pat ki dang don hapdeng ka jingleit bniah bha naki Doctor jong ka Hospital.
Ki samla pule kiba mynsaw jur ba shah syllad haka kali na phyllaw skulbah NEHU ki kynthup ka samla Daritngen Pohdukhei bad ka samla Stephanie Shadap, kiba pule ha Chemistry department.
