Nongpoh, Naiwieng 18: Ki Actor bad Actress ba paw nam ha ki rynsan ak phlim bollywood kiba kynthup ïaka Daisy Shah, Dev Menaria, Hiten Tejwani, Mubeen Saudagar, Jitt Raidutt, Pallavi Debnath bad u Dimpu Baruah ki la wan ban ïuh kjat ha ka skul bah University of Science and Tecnology Meghalaya (USTM) ban pynlait paidbah ïaka phlim bollywood kaba thymmai ba la ai kyrteng ka “Bihu Attack” ha kane ka sngi kaba dei ruh ka sngikha jong u Zubeen Garg.

Naka liang ka Skul Bah USTM ka la leh don burom ruh iaka sngi kha jong u Nongrwai ba Pawnam ka Ri u Zubeen Garg uba naka jylla Assam dakaba rwai iaki jingrwai kyrpang kiba utei u riew khraw u la dep thaw bad kiba long ruh ki jingrwai kiba la paw.

Ha katei ka sngi kitei ki Actor bad Actress ki la pynlait paidbah ïa ka jingrwai kyrpang bad ïaka Teaser jong katei ka phlim ka yn sa pyni paidbah pat ïaka phlim kaba pura ha ka 14 Tarik, Kyllalyngkot 2026 haki rynsan Cinama hakaba ia katei ka phlim la pynwandur dur halor ka jingshah hiar thma kaba shyrkhei bad ha kajuh kapor ban kyntiew ruh iaka jinglong ki Nong Assam bad kumjuh iaka Jingleh Ñiam Bihu.

Haba kren sha ki lad pathai khubor, naka liang ka Daisy Shah ha ryngkat bad u Dev Menaria ki la pan iaka jingkyrshan naki paidbah ba kin leit ban peit ia katei ka phlim thymmai jong ki ka ban sa wan haki cinema hall.

Ki la Pynpaw ruh ba ha kane ka phlim u Zubeen Garg u nongrwai ba paw nam ka jylla Assam u la don ka bynta kaba khraw ha kane ka phlim bad ka long ruh kaei kaei kaba dap daka jingkmen ba kane ka sngi kaba la ïoh ban  pynlait paidbah ïaka Teaser jong ka phlim Bihu Attack ka dei ruh ka sngi ban kynmaw burom ïaka sngikha jong u.