Shillong, Jylliew 18: Ka Faith Foundation kum kawei na ka kynhun trei mon sngewbha kaba peit kyrpang na ka bynta ban iada ia ka hok ki khynnah bad ruh ban pynkup bor ia ki samla ka jylla mynta ka sngi ka la leit ban ia kynduh ia u Myntri Rangbah ka jylla u Conrad K. Sangma na ka bynta ban ia kren bad ban phylliew jongmut halor ka jingdonkam na ka jingshah banbein ki khynnah bad ruh ba la donkam ban ai ka jingpynkup bor kaba kyrpang ia ki samla jong ka jylla.
Lyngba kane ka jingiakynduh ia u Myntri rangbah ka jylla, u Conrad K. Sangma, kane ka kynhun Faith Foundation ka la kham ban khia halor ki jingthmu bad ki jingangnud kane ka kynhun ban iada kyrpang ia ka hok ki khynnah ba kum ka sorkar ka dei ban phai khmat kyrpang ban iada ia ka hok ki khynnah bad ruh ban pyntreikam ia ka Personal Safety Education Programme khnang ba ki khynnah kin ioh ia ka jinghikai ban tip kyrpang kumno ba kin lait na ka jingshah banbein khamtam ka jingthombor ia ka longrynieng ki khynnah.
Kumba la pynpaw da kaba pyntreikam ia katei ka programme kumba la pyntreikam ha kylleng ki ri ka pyrthei kan iarap shibun ban pynduna ia ka jingshah banbein ki khynnah bad ka jingshah thombor ki khyllung ki khynnah ha ka imlang ka sahlang.
“Ngi la long kiba la kloi ban trei borbah na ka bynta ka jingshngaiñ bad ka jingioh bor ki khyllung ki khynnah bad ki samla hapoh ka jylla Meghalaya” ong ka Kong Shannon Dona Massar, Director ka Faith Foundation bad bynrap ruh ba lyngba ka Faith Foundation ki don ka jingshaniah ha u Myntri rangbah ka jylla ba un iohi jngai na ka bynta ban iada kyrpang ia ka hok ki khyllung khynnah bad ki khun samla ka jylla ban lait na shibun ki kam shah thombor hapoh ka jylla” ka la bynrap.
Lyngba katei ka jingiakynduh ia u Myntri rangbah ka jylla, u Conrad K. Sangma u la ong ba ka sorkar ka don hi ia kata ka bynta kaba khraw ban shim khia na ka bynta ban saindur ia ka lawei ki khun samla bad u la bankhia ruh halor ka jingdonkam ban ai bor ne pynkup bor ia ki samla bad ruh ban ia kren kyrpang ia shibun ki mat ki jura kiba ki khyllung khynnah bad ki samla ki ia kynduh hapoh ka jylla.
Na ka bynta ka ban iada ia ka hok ki khynnah bad ruh ban ai ka jingpynkupbor ia ki samla ka jylla, kane ka kynhun ka la don bynta ban pynsngewthuh ia kane ka phang sha ki 41 tylli ki skul, 14715 ki samla pule bad 1823 ngut kiba la heh la san hapoh ka jylla bad kane ka kynhun kan dang pyniar ia ka jingtreikam ban poi sha ka baroh ki bynta jong ka Meghalaya ban pynsngewthuh halor ka hok ki khynnah bad ruh ban ai kata ka jingpynkupbor ia ki samla ka jylla.
Lyngba kane ka jingiakynduh ia u Myntri rangbah ka la long kaba seisoh ha kaba u myntri rangbah ka jylla u la ai jingmut ba kane ka kynhun kan treikam ruh bad kiwei kiwei ki tnad sorkar bad kumjuh ruh ban pyntreikam ia ki prokram bapher bapher ban iada kyrpang ia ki khynnah bad ruh ka jingpynkupbor ia ki samla da ka jingiatrei lang na baroh ki tnad sorkar hapoh ka jylla.
Lyngba kane ka jingiakynduh ia u Myntri rangbah, ka thong kaba ki la buh ka long ban pyntreikam ia ka Personal Safety Education Program bad ruh ban shim ia kita ki lad ki lynti ban ai ka jingiada kaba krypang ia ka hok ki khynnah bad ban ai ka jingpynkupbor ia ki samla lyngba ka jingiatrei lang bad ka sorkar jylla.
KYNDUH KA FAITH FOUNDATION IA U CM KA MEGHALAYA BAN IA KREN IA KI LAD JINGIADA BAD KA JINGPYNKUP BOR IA KI SAMLA
