New Delhi, Jylliew 18:
Ha ka sien kaba nyngkong eh ha ka jingim ka jongka, ka Priyanka Gandhi, kaba dei ka para jong u Rahul Gandhi bad ka khun jong u (L) Rajiv Gandhi bad ka Sonia Gandhi, kan mih pyrthei ban iakhun ia ka ilekshon Lok Sabha na Wayanad konstitwensi jong ka jylla Kerala hadien ba u hynmen u jongka, u Rahul Gandhi uba la jop na ki ar tylli ki konstitwensi ha kane ka ilekshon Lok Sabha kaba dang shu dep shen, u la rai ban pyllait noh bad ban iaineh bad ka Raebareli jong ka jylla Uttar Pradesh.
Ia kane la pynbna paidbah da ka seng Congress ha ka lah sngi U Blei hadien ka jingialang jong ka High-Level jong ka seng kaba la pyniaid da u Mallikarjun Kharge, President jong ka seng ha ka nongbah New Delhi, kaba wan ban iashim bynta ruh da ka Priyanka Gandhi, u Rahul Gandhi bad kiwei kiwei de ki heh nongialam jong ka seng Congress. Kane ka jingshim ia katei ka rai kadei ruh hashwa ba ka tarik kaba khatduh ia u Rahul Gandhi ban jied ia kano ka konstitwensi kaba u sngewbit kan kut noh, kata ha ka 18 tarik jong u bnai Jylliew, 2024.
“Ka seng ka la shim ia ka rai ba u Rahul Gandhi udei ban don ha Raebareli namar kadei kaba u iajan eh bad u bad ka ing ka sem ka jong u mynta da ki bun bun snem. Ki paidbah jong katei ka konstitwensi lem bad ki nongialam jong ka seng Congress ki sngew ba kane ka rai kadei kaba biang eh na ka bynta ka seng bad wat lada ki paidbah jong ka Wayanad ki kwah ba u Rahul Gandhi un iaineh ha katei ka jaka, ki kyndon ain kim shah, kumta ngi la rai ba ka Priyanka Gandhi kan mih shakhmat ban iakhun na Wayanad”, la ong u Mallikarjun Kharge, President jong ka seng Congress.
Na ka liang jong u Rahul Gandhi u la ong ba ka para ka jong u, ka Priyanka Gandhi kan iakhun na Wayanad bad nga ruh ngan leit sha katei ka jaka bunsien ban pynurlong ia ki kular kiba u la khlei sha ki paidbah bad ba un iai don ryngkat bad ki.
“Nga kyrmen skhem ba ka Priyanka kan jop ia kane ka ilkehson bad kan long ruh ka nongialam kaba tbit bad ki paidbah jong ka Wayanad ki lah ban shim ruh ba ki don ia ar ngut ki nongmihkhmat, ka para ka jong nga, bad manga. Ka jingkhang ka jong nga kan iai plie baroh shi lynter ka jingim ka jong nga bad nga ieid ia baroh ki paidbah jongka Wayanad” la ong u Rahul Gandhi.
Haba pyrshang ban kylli, kaei ka jingsngew ka jongka, ka Priyanka Gandhi ka la pynpaw ba ka dap da ka jingsngewkmen shikatdei bad kan nym ailad ba ki paidbah jong ka Wayanad ba kin don ia ka jingsngew ba u hynmen u jongka um long shuh u nongialam jongki da kaba ong ba ‘kumba u la kren, un ialeh ban wan jngoh bunsien bad nga. Bad ngan trei shitom ban long ka nongialam kaba bha. Nga don ia ka jingiadei bad ka Raebareli kaba rim bha bad nga la shakri hangtei la kumba 20 snem, kane ka jingiadei kan nym dkut shuh bad ngan iarap ia u hymen u jong nga hangtei ha Raebareli bad ngin don ryngkat ha baroh ar kine ki konstitwensi’ la ong ka Priyanka Gandhi.
